Дорноговь аймгийн Замын-Үүд сумын гуравдугаар багийн иргэн Бат-Оргил гэх эв эрүүл байсан залуу Э-Транс дахь гаалийн хяналтын бүсэд том оврын ачааны машинаас цемент буулгаж байхдаа хүнд бэртэж эрүүл мэндээрээ хохирсон харамсалтай хэрэг гарсан.  Тодруулбал, өнгөрсөн оны наймдугаар сард Бат-Оргил хоёр найзтайгаа нийлж хэдэн төгрөг олохоор Э-Транс дахь гаалийн хяналтын бүсэд том оврын ачааны машинаас цемент зөөхөөр болжээ. Ингэхдээ тухайн машины жолооч нартай аман гэрээ байгуулан, тохиролцсон аж. Ингээд ойролцоогоор 64 тонн цемент буулгахаар ажиллаж байтал дээрээс нь нэг тонн хэртээ цемент унаж, улмаар хүнд бэртэж эмнэлэгт хүргэгджээ. Тэрбээр нуруу, нугасны хүнд гэмтэлтэй гэх оноштой Улаанбаатар хотод ирж Гэмтэл, согог судлалын үндэсний төвд хоёр сар гаруй хугацаанд хэвтсэн ч бие нь огт дээрдээгүй байсаар нутаг буцжээ. Гэвч бие нь өдрөөс өдөрт муудаж, бөгсөн бие нь мэдээгүй болсон байна.
Юутай ч тээвэр зуучлалын чиглэлээр үйл ажиллагаа явуулдаг “Э-Транс ложистик” компанийн ачааг буулгаж байхдаа ийн гэмтсэн ч тэд “Манай ажилчин биш болохоор бид хариуцахгүй” гээд халгаахгүй өдийг хүрчээ. Харин аман гэрээ байгуулсан гэх жолооч нь зугтаад явсан гэдгийг ар гэрийнхэн нь онцолжээ.