Дэлхийн хамгийн олон хэрэглэгчтэй нийгмийн сүлжээнүүдийг нэг “Твиттер”-ийн Гүйцэтгэх захирал Дик Костоло ажлаа өгч байгаа тухай компанийн зүгээс албан ёсоор мэдээллээ.

Түүний ажлыг Твиттер компанийг хамтран байгуулагч Жак Дорсей долдугаар сарын нэгний өдөр хүлээн авах аж. Жак Дорсей шинэ гүйцэтгэх захирал томилогдтол түр орлон гүйцэтгэгчээр ажиллах юм байна.

Твиттер компани 6 жил гүйцэтгэх захирлаар ажилласан Дик Костологийн залгамжлагчийг томилох үүрэгтэй хороо байгуулсан тухайгаа мэдээлжээ. Хороо нь уг албан тушаалд амжилттай ажиллах хүнийг компани дотроос эсвэл гаднаас олж, зөвлөлд санал болгох үүрэгтэй аж.

Твиттер “Гүйцэтгэх захирал ажлаа өгнө” гэж жиргэсний дараа хувьцаа нь 7 хувиар өссөн байна.

Дик Костологийн ажлаа өгсөн шалтгааныг хөрөнгө оруулагчдын зүгээс түүнд дарамт ирсэн хэмээн тайлбарлаж байна. Компанийн хөрөнгө оруулагчид шинэ хэрэглэгчдийн тоо өсөхгүй байна хэмээн шүүмжилж, Дик Костолод үр дүнг сайжруулах эсвэл ажлаа өгөх гэсэн сонголт санал болгосон хэмээн барууны хэвлэлүүд бичицгээжээ. Түүний гол алдаа нь шинэ хэрэглэгчдийг татаж чадаагүй хэмээн шинжээчид дүгнэжээ.  

2013 онд Нью-Йоркийн хөрөнгийн биржид анх хувьцаагаа гаргасан Твиттерийн хувьцаа нийт 30 хувиар унаад байсан юм.

“eMarketer” судалгааны агентлагийн мэдээлснээр Твиттерийн шинэ хэрэглэгчийн тоо энэ жил сард дунджаар ердөө 14.1 хувиар өсчээ. Харин компани энэ байдлаараа ажиллавал энэхүү муу үзүүлэлт 2019 он гэхэд жилд 6 хувь болж улам буурна хэмээн дүгнээд байсан аж.

Дик Костоло ажлаа өгсөн ч комданийн зөвлөлд үлдэх юм байна.

Г.Үжин