Ард түмэн “Нүүрс” хөтөлбөрийг хэрэгжүүлж өгөхийг хүслээ. Гэр хорооллын 80 мянган иргэний төлөөлөл өнөөдөр Засгийн газар, Ерөнхийлөгчид хандаж “Нүүрс” хөтөлбөрийг хэрэгжүүлж өгөхийг хүсч байгаагаа илэрхийлж хэвлэлийн бага хурал хийлээ.

Тэд хүйтний ам наашлаж, хөхүүрийн ам цаашилж байгаа өнөө үед нүүрсний үнэ өдрөөс өдөрт нэмэгдэж ард түмний нуруун дээр ирж байгаа ачаа ихсэж байгаа тул “Нүүрс” хөтөлбөрийг хэрэгжүүлж өгөхийг хүссэн юм. Учир нь уг хөтөлбөр нийслэлчүүдийн бараг 70 гаруй хувь нь амьдардаг гэр хорооллын иргэдэд маш их тус төхөм болж, нүүрсний үнийг буруулж өгсөн гэдгийг тэд өгүүлсэн.

Түүнчлэн “Нүүрс” хөтөлбөр хэрэгжиж байх үед иргэд 40 кг жинтэй шуудай нүүрсийг 3200 төгрөгөөр худалдаж авдаг байсан бол өнөөдөр 20 кг-ын шуудай нүүрсийг 3500-4500 төгрөгөөр худалдан авч байна. Энэ бол анхны цас орохтой зэрэгцэн гарсан үнэ. Цаашид “Нүүрс” хөтөлбөрийг хэрэгжүүлж, үнийг барихгүй бол нүүрсний үнэ “тэнгэрт гарна” гэдгийг ч хэлсэн. Одоогоос 2 жилийн өмнө “Нүүрс” хөтөлбөр хэрэгжиж байх үед тус хөтөлбөрийн нүүрс хямд байсан болохоор ченж нараар дамждаг нүүрсний үнэ ч тогтворжсон байна.

Тиймээс эдийн засаг хүндэрч, ард түмний амьдрал хэцүү байгаа үед тус хөтөлбөрийг хэрэгжүүлэх нь ус агаар мэт хэрэгтэй байгааг иргэд хэлж байлаа.  

Б.Даваацэрэн Сонгинохайрхан дүүргийн иргэн

-“Нүүрс” хөтөлбөр үнэхээр иргэдэд хэрэгтэй байгааг та бүхэн юугаар нотлож байгаа юм бэ?

-Үүнийг гэр хороололд амьдардаг иргэд бүгд нотолно. “Нүүрс” хөтөлбөр хэрэгжиж байхад нүүрсний үнэ тогтвортой, хямд байсан. Гэтэл энэ хөтөлбөр зоссоноос болж өнгөрсөн жил гэр хорооллын иргэд үнэтэй нүүрс түлж, зутруухан л өвөлжсөн. Энэ байдал энэ жил ч давтагдаж, түүнээс дор зүйл болох гээд байна. Өнөөдөр нэг шуудай нүүрс хэдийнэ 4500 төгрөг болчихсон. Энэ бүхэн “Нүүрс” хөтөлбөр ямар хэрэгтэй байсан, одоо иргэдэд маш чухал шаардлагатай байгааг нотлож байна шүү дээ.

-Нүүрс хөтөлбөр хэрэгжих үед нүүрсний үнэ 200 мянган төгрөгт хүрээгүй гэх мэдээлэл байгаа. Тухайн үед нүүрсний үнэ хэд байсан юм бэ?

-Тухайн үед үндсэн дэвшийн нүүрсний үнэ 200 мянган төгрөг байсан. Харин Нүүрс хөтөлбөр хэрэгжиж 80 мянган төгрөг болгосныг гэр хорооллын 80 мянган иргэн ам нэгтэй хэлнэ.

-Өнөөдрийн байдлаар портер нүүрсний үнэ хэд байна вэ. Олдоц хэр байна?

-Багануурын шигшиж, ангилаагүй, хог, чулуутайгаа ачигдаж ирсэн нүүрс 160 мянгаар зарагдаж байна. Харин жижиг шуудайтай нүүрс 3500-4500 төгрөгийн үнэтэй байна.

Ц.Пүрэвсүрэн СХД-ийн 7 дугаар хорооны иргэн

-Нүүрсний үнэ энэ жил нэлээд үнэтэй байх шиг байна. Энэ талаар яриач?

-Тийм ээ. Энэ жил мичин жил болохоор хүйтэн хатуу өвөл болно гэдгийг хүмүүс хэлээд байгаа. Гэтэл гэр хорооллын иргэдийн гол хэрэгцээ болсон нүүрсний үнэ  өндөр байгаа нь үнэхээр хэцүү санагдаж байна. Тиймээс л бид Нүүрс хөтөлбөрийг хэрэгжүүлж өгөхийг төр засгаасаа хүсээд байгаа юм. Үнэхээр бид л нүүрсний үнэ өндөр байгаагаа дуулгахгүй бол паалантай жорлонтой, паартай байшинд амьдарч байгаа хүмүүс үүнийг ойлгож, мэдэхгүй шүү дээ.  

-Нүүрс хөтөлбөр хэрэгжвэл нүүрсний үнэ тогтвортой байж чадах болов уу?

-Мэдээж чадна. Энэ хөтөлбөр хэрэгжиж эхлээд л нүүрсний үнийг бүтэн хоёр жил тогтвортой байлгасан. Харин одоо ямар ч хяналтгүй ченж нар амандаа багтсан үнээ хэлээд зогсож байна шүү дээ.

24tsag.mn