Манай улсын иргэд бүлэглэн Монголд сарын хугацаатай орчуулгын ажлаар ирсэн Ван Жан Гу гэгчийг айлган сүрдүүлж, мөнгө нэхэн хорьж дарамталсан хэргийг өдгөө Чингэлтэй дүүргийн цагдаагийн хоёрдугаар хэлтэс шалгаж байна.

Иргэний харьяалал шилжилт хөдөлгөөний ерөнхий газрын байранд хорьж байсан түүнийг монгол иргэн цагдаагийн байгууллагад хандсанаар олж, аюулгүй болгожээ. Түүнийг хорьж цагдаж байсан залуусын хувьд хутга, буу тулгаж хүнээс зайдуу газар аваачиж зодож дарамталсан байгаа юм. Ингэхдээ түүнийг 50 сая төгрөг өгөхийг шаардаж, ар гэрийнхэн рүү нь хүртэл холбоо бариулан мөнгө нэхүүлж байсныг өдгөө цагдаагийн байгууллагад мэдүүлээд байгаа аж.

Манай сурвалжлах баг Ван Жан Гу-гийн хэрэгт гэрчээр оролцож байгаа монгол дахь танилаас нь зарим зүйлийг тодруулахад "Өнгөрсөн сарын 29-ний 11:00 цагийн орчимд Ван Жан Гу гэнэт надруу өөрийн утаснаас биш өөр дугаараас ярьсан. Ингээд би гэрээсээ гараад тосоод авсан. Дөнгөж уулзаад байтал нэг машин хажууд ирж зогсоод, дотроос нь хэдэн залуус гар ирсэнээ "“Амрыг эрье” цагдаагийн байгууллагаас явж байна гэж хэлсэнээ шууд  үгийн зөрүү байхгүй энэ хүнийг цохиж, зодоод эхэлсэн. Улмаар намайг болиулах гэхэд намайг бас түлхэж унагааж, цохичихоод  Ван Жан Гу-г машиндаа хийгээд аваад явчихсан. Машиных нь дугаар "63-26" УНУ байсныг би араас нь хараад үлдсэн. Үүний дараа Ван Жан Гу руу юу болоод байгааг асууж утсаар ярихад "санаа зоволтгүй, би зүгээр" гэж хэлсэн. Тиймээс би цагдаагийн байгууллагад мэдэгдэлгүй долоо хоног хүлээсэн боловч Ван Жан Гу-гаас нэг ч холбоо бариагүй. Тиймээс учир явдлыг хэлж цагдаагийн байгууллагад хандсан байгаа.  Ингээд цагдаагийн байгууллага түүнийг олж ирэхэд энэ хүн биеийн байдал маш муу, үргэлж хамар амнаас нь цус гардаг болчихсон, маш их дарамт сүрдүүлгээс ирж байгаагаа хэлж цагдаагийн байгууллагад гомдол гаргасан. Миний хувьд уг хэргийн гэрчээр татагдаад байгаа. Ерөнхийдөө энэ хүнийг гадаад иргэн гэдгээр нь олзолж аваад ашиг олох гэсэн залуусын үйлдэл гэж ойлгож байна" гэлээ.

Ван Жан Гу гэх эл иргэний хувьд орчуулга хийхээр ирсэн боловч ийн бусдын сүрдүүлгэнд явсаар байгаад өдгөө бичиг баримтгүй, халаасны мөнгө ч үгүй болж үлдсэн байна. Тодруулбал, түүний хувьд цаг агаар дулаан байхад орчуулга хийж хэдэн төгрөг олох зорилготой солионы хувцас ч үгүй Монголд ирсэн аж. Гэвч өнөөдөр орчуулга хийж өгөх хүмүүс нь нутаг буцаж тэрбээр буцах зардалч байхгүй хоцорчээ. Манай сурвалжлах багийг түүнтэй уулзахад тэрбээр эмэгтэй хүний куртик гуйж  өмссөн, солионы ч хувцасгүй, өмсөж ирсэн хувцаснуудаа танхай эрчүүдийн гарт уруулсан байдалтай байсан юм.

Ингээд бид Ван Жан Гу-гаас зарим зүйлийг тодрууллаа.

-Монгол залуус таныг ямар ч шалтгаангүйгээр саатуулж, мөнгө нэхэж дарамталсан юм бэ?

-Сүрдүүлсэн гэх таван залуугийн нэгийг л зүс танина. Тэдгээр залуус ямар ч шалтгаангүйгээр их хэмжээний мөнгө нэхэж хутга тулгаж сүрдүүлж бүх карт дансыг маань шалгасан. Улмаар 50 сая төгрөгний өртэй гэх бичгийг бичүүлж, наториатаар батлуулсан. Улмаар энэ мөнгийг таньдаг хамаатан садан, гэр орныхоосоо нэх хэмээн сүрдүүлж өдөр бүр утсаар яриулж байсан.

Миний бүх бичиг баримтыг хурааж авсан. Одоо цагдаагийн байгууллага хурааж аваад, надад өгнө гэж бодож байна.

Сүүлийн гурван хоногт Иргэний харьяалал шилжилт хөдөлгөөний ерөнхий газрын байранд аваачиж хорьсон.  Энэ газрыг би нисэх буудалтай ойрхон болохоор мэдэж байсан. Тэнд яг хорих анги шиг тусгаарласан өрөөтэй. Надтай бас 5 хятад иргэн, 5 вьетнам иргэн хоригдож байсан.  Би хятад хэл дээр "эдгээр хүмүүст би 50 сая төгрөгний өргүй" гэж ажилчдад бичиж өгсөн. Гэвч тэнд байсан хүмүүс шоолохоос өөр зүйл хийгээгүй.

-Таныг хорьж байсан газрын хувьд албан байгууллага байсан гэсэн. Энэ талаар дэлгэрэнгүй мэдээлэл өгөхгүй юу?

-Эхлээд голын эрэг, айлын хашаанд аваачиж дарамталж байсан. Байнга буу, хутга тулгаж байсан. Сүрдүүлэхдээ "Арьс махнаас чинь салгаж нохойд өгнө, чамайг бид Монголын шоронд хийж чадна. Надад Монголын бүх газар үйлчилдэг. Шоронд орчихсон хойно чинь хүмүүсээр зодуулж байгаад л алуулчихна. Чамайг шороонд булаад, гол руу алаад хийчихсэн байсан ч хүн олохгүй. ДОХ-той эмэгтэйн цусыг шахна. Орой болохоор чамайг өвөртөлж унтаж, өвтгөнө" гэх үгсийг их хэрэглэж байсан.  Мөн хэдхэн минутын зайтай гэр орон, танил талруу минь яриулж мөнгө нэхүүлсэн.

Энэ бүх дарамтаас болж сахарын хууч өвчин маань сэдэрч, татаж унах гээд байсан.

Сүүлийн гурван хоногт Иргэний харьяалал шилжилт хөдөлгөөний ерөнхий газрын байранд аваачиж хорьсон.  Энэ газрыг би нисэх буудалтай ойрхон болохоор сайн мэдэж байсан. Тэнд яг хорих анги шиг тусгаарласан өрөөтэй. Надтай бас 5 хятад иргэн, 5 вьетнам иргэн хоригдож байсан.  Би хятад хэл дээр "эдгээр хүмүүст би 50 сая төгрөгийн өргүй" гэж ажилчидад бичиж өгсөн. Гэвч тэнд байсан хүмүүс шоолохоос өөр зүйл хийгээгүй.  Харин биеийн байдал нь муудаж эхлэхэд цаг, цагийн зайтай даралт үзэж эм өгсөн.

-Энэ газраас та яаж гарсан юм бэ?

-Намайг аваачиж хориулсан залуу өөрөө батлан даалтад гаргасан. Харин Иргэний харьяалал шилжилт хөдөлгөөний газраас миний бичиг баримтыг батлан даалтад гаргасан залууд өгөөд явуулсан.

Тэр залуу намайг тавьж явуулахгүй авч явсаар байсан.  Улмаар бүр Өмнөговь руу авч явна гээд байж байтал цагдаагийн байгууллагаас намайг олж авсан.

Юутай ч Иргэний харьяалал шилжилт хөдөлгөөний ерөнхий газар зөрчил гарсан гадны иргэдийг хорьж цагддаг гэдэг нь түүний ярианаас ажиглагдаж байгаа юм. Гагцхүү иргэн хоорондын маргааныг үндэслэж хорьж цагдах эрх байдаг уу гэх асуудал анхаарал татаж байна.

Д.Ундрах /24tsag.mn/