Төрийн орон сууцны корпорациас Барилга хот  байгуулалтын сайд З.Баянсэлэнгэ болон газрын дарга нар, албаны бусад хүмүүст бүтээн байгуулалтын ажлуудаа танилцууллаа. Танилцуулах арга хэмжээний хүрээнд “Буянт-Ухаа 1”, “Буянт-Ухаа 2” хороолол болон тэдгээрийн бохирын асуудлыг шийдвэрлэх бага оврын цэвэрлэх байгууламжийн ажлуудыг газар дээр нь очиж танилцуулсан юм.

“Буянт-Ухаа 2” хороолол нь 9 давхар 48 барилга, 12 давхар 60 барилгатай байхаар төлөвлөгдсөн, 240 хүүхдийн 4 цэцэрлэг, 940 хүүхдийн 2 сургууль, нэгдсэн автомашины 7 давхар зогсоол бүхий томоохон цогцолбор хороолол юм. Үүнээс 2592 айлын 9 давхар 48 барилгын ажлыг Үндэсний бүтээн байгуулалтын корпораци захиалгаар гүйцэтгэж байгаа. Одоогоор эхний ээлжинд ашиглалтад орох 30 барилгын гүйцэтгэл 85 хувийн гүйцэтгэлтэй буюу барилгын гадна засал, дотор инженерийн шугам сүлжээний ажил 100 хувь дуусч, дотор заслын гүйцэтгэл үргэлжилж байгаа аж.  

Мөн тус хорооллын 240 хүүхдийн цэцэрлэгийн барилга угсралтын ажил 80 гаруй хувьтай байгаа тухай Төрийн орон сууцны корпорацийн ерөнхий захирал А.Гантулга мэдэгдлээ. Тус корпораци нь 2013-2014 онд Үндэсний бүтээн байгуулалтын корпораци 1764 айлын орон сууц, 120 хүүхдийн цэцэрлэг, 380 ам метр талбайтай үйлчилгээний төв бүхий “Буянт-Ухаа 1” хорооллыг амжилттай хэрэгжүүлсэн билээ.

Энэ өдөр тэд бүтээн байгуулалтын ажлаа танилцуулахаас тулгарч буй асуудлаа салбарын яамныханд мэдэгдэж, холбогдох арга хэмжээг авч өгөхийг хүсч байлаа. Үндсэндээ  “Буянт-Ухаа 2” хорооллын барилгын ажил хэвийн явагдаж, төлөвлөгөөт хугацаанд нь ашиглалтад оруулах бүрэн боломжтой ч, цахилгааны асуудлаас болоод хойшилж болзошгүй байгааг ТОСК-ийн тэргүүн дэд захирал Д.Алтанхуяг мэдэгдсэн юм. Одоогоор барилга угсралтын явцад шаардагдах тогийг түр цахилгаанаар шийдэж байгаа аж. Гэвч барилга ашиглалтад орсны дараах эрчим хүчний хэрэглээг үндсэн цахилгаанаар шийдэхгүй бол хүчин чадал нь хүрэхгүй гэнэ. Тус хорооллыг эрчим хүчээр хангах шинэ станцын барилга угсралтын ажил санхүүжилтийн улмаас зогсонги байдалд орсноор ийнхүү цахилгааны асуудал үүссэн байна. Дээрх дэд станцыг ашиглалтад оруулахын тулд 1.8 тэрбум төгрөг шаардлагатай байгаа гэдгийг холбогдох албаныхан нь мэдэгдсэн юм.

Түүнчлэн “Буянт-Ухаа 2” хорооллын орон сууцыг иргэдэд хүргэх, тэдэнд борлуулахын тулд ипотекийн зээлийн 10 хувийн урьдчилгаа олгох шийдвэрийг хэрэгжүүлж эхлэх нь чухал байгааг төсөл хэрэгжүүлэгчид онцолж байлаа.

Энэ талаар БХБ-ын сайд З.Баянсэлэнгэ: "Орон сууцны зээлийн 10 хувийн урьдчилгааг хэрэгжүүлэх ажлаас шалтгаалан зарим барилгын ажил, орон сууцны борлуулалт хүлээлттэй байна гэх асуудал яригдаж байна. Үүнийг үгүйсгэх аргагүй юм. Яамны зүгээс энэ шийдвэрийг аль болох хурдан хэрэгжүүлэх тал дээр анхаарч байна. Гэхдээ Монголбанк, Хөгжлийн банкнаас бусад банкуудтай зөвшилцөх, хөрөнгө санхүүжилтийг шийдэх гэсэн асуудлууд байгаа учраас хүлээгдэж байгаа. Талууд байр сууриа илэрхийлээд, саналын хувилбаруудаа гаргасан ч эцсийн байдлаар эдгээрийг нэгтгэсэн шийдвэр хараахан гараагүй. Өнөөдрийг хүртэл 10 хувьтай холбоотой албан мэдээлэл өгөхгүй байсан нь үүнтэй холбоотой.  Эдийн засгийн хүндрэлтэй байгаа энэ үед 200 тэрбум төгрөгийн санхүүжилтийг заавал мөнгөн бус, өөр хэлбэрээр байршуулах саналыг засгийн газраас тавьсан ч, банкууд үүнийг мөнгөн хэлбэрээр байршуулах шаардлага тавьж байна. Үүнээс гадна эрсдлийн асуудал бий. Иргэн зөвхөн 10 хувиа гаргаад, үлдэгдэл 90 хувийг зээлээр авна гэдэг нь өөрөө маш том эрсдэл. Зээлийн хувь өндөр, хугацаа урт байна гэдэг тухайн иргэний хувьд ч, төр засгийн хувьд ч томоохон эрсдлийг авчирна. Энэ бүхнийг нарийн тооцоолох, яавал иргэдийн нуруунд хүнд ачаа болголгүйгээр асуудлыг шийдвэрлэх вэ гэдэг дээр яригдах асуудал их бий. Мөн ТОСК-ийн захиалгын дагуу, ерөнхий гүйцэтгэгчээр ажиллаж буй Үндэсний бүтээн байгуулалтын корпорацийн зүгээс бүтээн байгуулалтын ажлуудыг салбарын сайд болон бусад албаны хүмүүст танилцуулсан. Тус корпораци нь барилгын ажлуудыг чанартай гүйцэтгэж, Монгол ажиллагсдаар хүний нөөцөө бүрдүүлэхэд голлон анхаарч байгаагаа мэдэгдсэн юм. 

Үндэсний бүтээн байгуулалтын корпорацийн ерөнхийлөгч Б.Жүгдэр: Үндэсний бүтээн байгуулалтын корпораци нь Хөшигтийн хөндийн терминал, бетоны ажил, “Хүннү хороолол”, “Виста”, “Шератон” зочид буудал, “Khans Vill” зэрэг томоохон хэд хэдэн төслийг гүйцэтгэсэн таван компаниас бүрдсэн барилгын ажил гүйцэтгэлээрээ улсдаа тэргүүлэгч “Дельта Констракшн”, “БҮТИ”, “И Си Си”, “Улаанбаатар Барилга”, “Эрэлт Импэкс” гэсэн таван компаниас бүрддэг. Бид ТОСК-ийн хоёр дахь захиалга дээр ажиллаж байна. Ерөнхий санхүүжилтийг гаргагч ТОСК-иас өнгөрсөн онд ашиглалтад оруулсан барилгууд болон бусад эх үүсвэрээс босгосон хөрөнгө мөнгө, бондын хөрөнгө гээд олон талаас санхүүжилт хийгдэж байгаа ч энэ нь 1-2 сараар хоцрох гэх мэт жижиг асуудал гардаг, гэхдээ бид хоорондоо зохицож, харилцан уялдаатай ажиллаж байгаа. Гүйцэтгэгч компаниуд ч өөрийн хөрөнгөөр зарим ажлыг үргэлжлүүлэн хийж байгаа тал бий. 

"Буянт-Ухаа 1" хорооллыг дулаан болон цэвэр усаар хангах шугам сүлжээ, тунель

"Буянт-Ухаа 1" хорооллын бохир усыг татан зайлуулах зорилгоор нисэхийн цэвэрлэх байгууламжийг өргөтгөж, 2000 шоо метр бохир ус хүлээн авч, цэвэрлэх хүчин чадал бүхий цэвэрлэх байгууламж