АН-ынхан дахиад л Их тэнгэрт хуралдсан байна. Хоёр долоо хоногийн өмнө Ерөнхийлөгч тус намынхныг Их тэнгэрт цуглуулсан бол энэ удаад АН-ын дарга З.Энхболд Их тэнгэрийн ээлжит уулзалтыг зохион байгуулжээ. Өмнөхөөсөө ялгаатай нь хуралд АН-ын бүлгийн бүх гишүүнийг урьсан байна. Эхний уулзалтад зөвхөн фракцын дарга нар оролцож Засгийн газрын тогтвортой байдлын асуудлыг ярьсан бол энэ удаагийнхаар 2016 оны улсын төсвийг хэлэлцжээ.

Төрийн ордноос гадуур, тэр тусмаа амралтын өдөр (өнгөрсөн бямба гаригт) хуралдсан АН-ын бүлгийн хуралд гишүүдийнх нь ердөө тал нь оролцжээ. Ярьсан сэдэв нь дээр өгүүлсэнчлэн төсөв. Засгийн газраас 2016 оны төсвийн төслийг УИХ-д өргөн барихдаа дагалдах хуулийн төслүүдийгч бас өргөн мэдүүлсэн нь АН-ыг Их тэнгэрт хуралдах шалтгаан болжээ. Өөрөөр хэлбэл, ирэх оны наймдугаар сараас Засгийн газрыг есөн яамтай ажиллуулах төсөл өргөн барьсан нь Ч.Сайханбилэгийн танхимын тогтвортой байдалд нөлөөлнө гэж үзжээ. Иймээс Засгийн газарт энэ төслийг эргүүлэн татахыг чиглэл болгосон байна. Мөн энэ хурлаар төрийн албан хаагчдыг цомхотгох, цалинг нь танахтай холбоотой Засгийн газрын саналыг хэлэлцжээ. Бүлгийн гишүүдийн хувьд цалинг бууруулна, бууруулахгүй гэхчилэн олон талаас нь ярьсан ч эцсийн шийдвэр гаргаж чадаагүй таржээ. Энэ хуралд АН-ын бүлгийн гишүүдийн ирц хангалттай хэмжээнд байж чадаагүй учраас өнөөдөр Төрийн ордонд болох ээлжит хуралдаанаараа эцэслэн шийдье гэж шийдсэн байна.

УИХ дахь АН-ын бүлэг ийнхүү албан бусаар Их тэнгэрт хуралдсан бол “Шударга ёс” эвслийнхэн ч Төрийн ордны гадуур хуралдсан мэдээлэл бий. Өршөөлийн хуулийг батлахын өмнөх өдөр эвслийн бүлэг Н.Энхбаярын санаачилгаар “Өргөө” зочид буудалд өргөтгөсөн бүрэлдэхүүнтэй хуралдсан юм байна. Ингэхдээ "АСЕМ"-ыг зохион байгуулахаас татгалзах саналыг гаргаж, энэ талаар Ерөнхий сайдад асуулга хүргүүлэх талаар ярилцсан сураг байна.