ОУВС: Дэлхийн эдийн засгийн өсөлт дэндүү удаашралтай явагдаж байна

2016-4-14

ОУВС, Дэлхийн Банк болон "Их Хорь"-ийн эдийн засаг, санхүүгийн салбарынхны уулзалт АНУ-ын Вашингтон хотноо энэ долоо хоногт зохион байгуулагдаж байна. Ирэх бямба гаригийг дуустал үргэлжлэх энэ удаагийн уулзалтаар дэлхийн эдийн засгийн өнөөгийн болон хэтийн төлөв байдлын талаар албаны санхүүгийн шинжээчид чуулан уулзаж, ярилцаж байгаа юм.

Энэ үеэр дэлхийн санхүүгийн хямрал анх эхэлснээс хойш 8 жил өнгөрөөд байгаа хэдий ч дэлхийн эдийн засаг эмзэг хэвээр байгаагаас гадна дахин хямарч магадгүй дүр зураг ажиглагдаж байгаа талаар мэргэжилтнүүд хэлсэн байна. Мөн ОУВС-аас бүс нутгуудын болон дэлхийн эдийн засгийн өсөлтийн хэтийн төлвийг танилцууллаа. Ахлах эдийн засагч Моурис Обстфельд

"Дэлхийн эдийн засгийн өсөлт үргэлжилж байгаа хэдий ч өсөлт дэндүү удаан явагдаж байгаа нь сөрөг үр дагавар, эрсдлүүдийг авчирч байна. Дэлхийн эдийн засаг 2016 онд бага зэрэг өсөх хэтийн төлөв ажиглагдаж байна. 2015 онтой харьцуулахад 3.2 хувиар өсөх төлөвтэй байгаа бөгөөд цаашлаад 2017 онд дэлхийн эдийн засгийн өсөлт дахин 3.5 хувиар нэмэгдэнэ гэж харж байна. Гэсэн хэдий ч эдгээр урьдчилсан таамаглалууд цаг хугацааны явцад буурах магадлалтай"

гэлээ.ОУВС-ийн ахлах эдийн засагч Моурис Обстфельд мөн дэлхийн эдийн засгийн өсөлтөнд хөрөнгийн зах зээлийн хувьсамтгай байдал, цагаач дүрвэгсдийн шилжилт хөдөлгөөн болон Их Британи Европын Холбооноос гарах зэрэг улс төрийн асуудлууд нөлөө үзүүлнэ хэмээн онцлон хэлсэн байна.

Ганбаатар Мөнх-Эрдэнэ /UBS/

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.

Сэтгэгдэл (1)

zochin (202.179.24.207)

dahin 3.5 huviar nemegdeh bish 3.5 huvi bolj osoh bailgui dee.

2016 оны 04 сарын 14 | Хариулах