ЗГХЭГ-ын дэд дарга асан Г.Дэнзэн нарт холбогдох хэргийн шүүх хуралдаан Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд тав дахь өдрөө үргэлжилж байна.  Тус шүүх хурлыг нээлттэй явуулж байгаа. Тиймдээ ч хэн нь юу гэж мэдүүлж , хэн гэдэг шинжээч ямар тайлан танилцуулж, түүнд нь улсын яллагч ямар яллах дүгнэлт үйлдэж байгаа, цаашлаад нь шүүх хурал дээр ярьж буй зүйлүүд хуульд нийцэж байгаа эсэх нь нээлттэй харагдаж байгаа. Харамсалтай нь шүүх хуралдааны үйл явц энэ хэрэг цаанаа захиалагчтай гэх хардлагыг улам лавшруулсаар байна.

Тодруулбал шүүх хурлын хоёр дахь өдөр шинжээчийн дүгнэлтийг хэлэлцэх үеэр тус хэргийг шинжлэн дүгнэлт, тайлан гаргасан шинжээч Д.Соёлмаа ёстой л олны хөх инээдийг хүргэж орхисон. Аливаа шүүх хуралд шинжээчийн гаргасан дүгнэлт маш чухал үүрэг гүйцэтгэдэг. Шинжээчийн дүгнэлтийг үндэслэн улсын яллагч яллах дүгнэлт үйлддэг гэхээр шинжээчийн гаргасан дүгнэлт аливаа хэрэгт буруутгагдаад буй хүмүүсийн хувь заяаг шийдэх гол үндэслэл болдог учиртай.

Гэтэл гаргасан дүгнэлтээ ямар эх сурвалж, баримт үндэслэн гаргасан гэдгээ мэдэхгүй, зах зээлийн үнээ ч судлаагүй “алибаба” гэх сайтаас авсан үнээр тооцоолж дүгнэлт гаргасан гэх шинжээч шүүх хуралд оролцож олны өмнө шившигээ тарьсан нь үнэхээр харамсалтай. Түүнчлэн улсын яллагч нь ч бас яллаж байгаа асуудлаа ч бүрэн ойлгоогүй, “Эрдэнэс таван толгой” компаний статусыг нь ч мэдэхгүйгээр яллах дүгнэлт үйлдсэнийг өмгөөлөгч нар нь шүүх хуралдааны үеэр удаа дараа залруулсаар байна.

Түүнчлэн уг нь Г.Дэнзэн нарт анх 17 тэрбумын гэх хэрэг дохож байсан ч өдгөө 200 сая төгрөгийн пүүний хэрэг болон хувираад буй. Тодруулбал Г.Дэнзэн нар Өмнөговь аймгийн Ханбогд сумын нутаг Цагаан хаданд Гаалийн хяналтын үйлчилгээ үзүүлэгч аж ахуйн нэгжийг сонгон шалгаруулах тендер зарлахдаа Г.Дэнзэнгийн эхнэр Ч.Уянгын нэр дээр бүртгэлтэй “Говь повер” ХХК-г иргэн Д.Баярмаагийн нэрээр оролцуулан ялуулсан.

Эдгээр хүмүүсийн хувьд "Эрдэнэс таван толгой" ХК-аас 5,3 тэрбум төгрөгийг "Говь повер" ХХК-ийн дансруу шилжлүүлэн авсан зэрэг 17 тэрбум төгрөгийн хэрэгт буруутган шүүгдэж байгаа билээ.  Гэтэл шүүх хуралдааны явцад “Говь повер” ХХК-ны эзэн хэн болох, ямар учраас дээрх мөнгө тус компаний данс руу шилжин орсон, МАН-ынханы сүр дуулиан болгож мэдээлээд байсан “хэрэг”-ийн учиг тайлагдах үед  өнөөх 17 тэрбум нь 200 сая төгрөгийн пүүний хэрэг болж байгааг өнгөрсөн өдрүүдэд бид нээлттэйгээр харсаар байна.

Цаашлаад дээрх хүмүүст санаатайгаар хэрэг дохож, яллах санаархал хүчтэйгээр явагдаж байгааг харуулсаар байна. Шинжээч нь өөрийнхөө гаргасан тайланг хамгаалж чаддаггүй, улсын яллагч нь яллаж байгаа асуудлаа мэдэхгүй, муйхараар нь дүгнэлт үйлддэг шүүх үнэнд нийцсэн шийдвэр гаргаж чадах уу эргэлзээтэй байна. Ямартай ч таван үргэлжилсэн шүүх хурал ийнхүү хуулийн байгууллагын үнэн төрхийг илчлэх нь ээ. Хэрвээ шүүх шударгаар шүүж чадвал Г.Дэнзэн нар цагаадна гэдгийг нийгэм даяараа мэдэж байгаа. Харин эсрэгээ ял оноовол энэ хэрэг цаанаа ямар нэгэн захиалагч бий гэдгийг батлан харуулна гэдгийг учир мэдэх хүмүүс хэлсээр байна.