Боловсрол, Соёл, Шинжлэх Ухаан, Спортын сайд Ц.Цогзолмаа өнгөрсөн оны аравдугаар сард Г.Чулуунбаатараас залгамжлан сайдын ажлаа эхлүүлсэн билээ. Тэрбээр ажлаа авсан даруйдаа халаа сэлгээ хийхээ хатуухан анхааруулж байлаа.
Тухайлбал тэрбээр яамны төрийн нарийн бичгийн дарга асан Ж.Болормаатай хамтран ажиллахгүй гэдэг шалтгаанаар ажлаас нь чөлөөлсөн. Өөр шалтгаан байхгүй. Түүний энэ дураараа үйлдэл олны зэвүүцлийг ихэд хүргэсэн юм. Түүнийг халсны дараагаар төрийн албаны шалгалт өгч хүний нөөцөд бүртгэлтэй байсан өмнөх Төрийн нарийн бичгийн дарга Б.Баярсайхан болон бусад хоёр хүнийг байсаар байтал тус албан тушаалд өөр нэгнийг сонгон шалгаруулжээ. Хэдийгээр түүний бүрэн эрхийн асуудал хэдий ч Б.Баярсайхан тэргүүтэй хүмүүсийн хувьд хөдөлмөр нь талаар болж буй хэрэг юм.
Уг нь түүнийг анх боловсролын салбарт ажиллаж байсан туршлагатай нэгэн гэж сайшааж байлаа. Харин одоо түүний үйлдлүүдийг “боловсролгүй хүнийх” гэж шүүмжилж байна.
Үүнээс гадна, Ц.Цогзолмаагийн ажлыг түүний орон тооны бус зөвлөх С.Мөнхөөлэй гэгч хүн өмнөөс нь хийдэг, уулзахаар очсон хүмүүсийг сайд биш зөвлөх нь хүлээн авдаг, яамны бичиг баримттай шууд танилцдаг гэх мэдээлэл гарсан. Өөрөөр хэлбэл УИХ-ын гишүүнийх нь хувиар зөвлөдөг нэгэн ажээ. Одоо бол С.Мөнхөөлэй гэгчийг яамны Төрийн захиргаа, удирдлагын газрын даргын үүрэг гүйцэтгэгчээр томилсон гэх.
Мөн тэрбээр энэ хугацаанд Архангай, Баян-Өлгийн лаборатори, Улаан хус сумын Хөх хөтлийн сургууль, Бугат сумын ЕБС, Дорноговь, Увс, Чингэлтэй дүүргийн 23, 29 дүгээр сургууль, Ховд аймгийн лаборатори нэгдүгээр сургууль, Завхан, Өвөрхангай, СХД-ийн 105, 9,107, 67-р сургууль, Хан-Уул дүүргийн 18, 41, 26-р сургуулиудын захирлуудыг ажлаас халсан байна.Тэдний зарим нь өргөдөл гомдол гаргаж байж ажилдаа эргэн орсон. Мөн Мэргэжил сургалт үйлдвэрлэлийн төвийн 17 захирлыг нэгэн зэрэг халжээ. Үүний дараагаар “Монголын ЕБС-иудын захирлуудын үндэсний зөвлөл" ТББ болон МСҮТ-үүд ажил хаях багш нарын тэмцэлд нэгджээ.Өөрөөр хэлбэл энэ нь тэмцэгчдийн хүрээг улам өргөтгөсөн ажил байлаа.
Боловсролын салбарт ажиллагсад “Бүхэл бүтэн яам удирдана гэдэг зогсоо зайгүй халж солино гэсэн үг биш. Өөрөөр хэлбэл боловсролын салбарыг дээрээс нь идэж эхлээд байна” гэх мэтээр ихэд шүүмжлэлтэй хандацгааж байсан. Улмаар тэдний ихэнх нь “халагдчих вий” гэсэн айдсаасаа болж тэмцлийнх нь эрч буурсаар байгаа юм.
Түүнийг саяхан дөрвөн ажилтнаа “надтай босож мэндэлсэнгүй” гэж ажлаас нь халсан гэх мэдээлэл тарсан юм. Мөн түүнчлэн Монголын багш нарын үйлдвэрчний хорооны дарга Д.Мөнхбаатар “Багшийн мэргэжил дээшлүүлэх институтийн 70 ажилтны 68-ыг нь ажлаас чөлөөлөх мэдэгдэл өгсөн” гэсэн ярилцлагыг өгсөн.
Тэрбээр эдгээрт залруулга хийж “Багшийн мэргэжил дээшлүүлэх институтэд бусад багш нартаа өөрөө үлгэрлэж чадах чадвартай арга зүйч нар ажиллаж байж, нийт багш нарынхаа мэргэжлийн болон ёс зүйн, мөн зөв хандлагыг бий болгоноо гэдгийг анхааруулсныг нийгмийн сүлжээгээр гуйвуулсан мэдээ явуулж буйд залруулга хийв. Өндөр шаардлага, өндөр хариуцлага нэхэж ажиллана” гэжээ.
Сайд Ц.Цогзолмаа энэ онд сургууль цэцэрлэгийн асуудлыг шийднэ гэж том дуугарсан. Гэтэл өнөөдөр хүүхдээ цэцэрлэгт өгөх гээд аав, ээжүүд азаа үзэж байх жишээтэй. Мөн зарим алслагдсан хороодод сургууль огт байхгүй. Үүний улмаас хүүхдүүд хүний наймаа, хүчирхийллийн золиос болсоор байгаа билээ. Түүний хувьд сургууль, цэцэрлэгийн асуудлыг халаа сэлгээгээр л шийдэх бололтой. Нэг ёсондоо удаан ажилласан, туршлагатай захирлыг нь халчхаар тухайн сургуулийн бүтэц толгойгоо тастуулсан хүнээс ялгаагүй болж байгаа юм.
Эдгээр томоохон халаа сэлгээнүүд нь голдуу намын шугамаар байдаг гэж ч яригдаад байгаа. Энэ талаар Багануур дүүргийн "Боловсрол" цогцолбор сургуулийн захирал, "Монголын ЕБС-иудын захирлуудын үндэсний зөвлөл" нийгэмд үйлчилдэг төрийн бус байгууллагын тэргүүн М.Туулсайхан ярьсан өнгөрөгч тавдугаар сард хэвлэлд өгсөн ярилцлагадаа дурдсан байдаг.
Өнгөрсөн онд манай улсын 21 аймаг есөн дүүргийн хэмжээнд 798 Ерөнхий боловсролын сургуульд 29242 багш, нийт 572.8 мянган сурагч, Цэцэрлэгт долоон мянга гаруй багш, 256.7 мянган хүүхэд байгаа бол 96 Их дээд сургууль, коллежид 6724 багш, 150 мянга гаруй оюутан байна гэсэн судалгаа гарчээ.
Харин БСШУС-ын сайд “эрхэм хатагтай” Ц.Цогзолмаа та дээрх гэр бүлийг оройгоос “хэмлэх”-ээ хэзээ зогсоох вэ. Хоттой хонинд орсон чоно шиг үйлдлүүдийн чинь үр нөлөөнд манай улсын Боловсролын салбарт ихээхэн хохирол учирч болзошгүй байна. Халж солихоосоо урьдаар сургууль, цэцэрлэгээ олшруулж, орчин нөхцөлийг нь сайжруулбал ирээдүй хойч үе минь наанадаж айдасгүй боловсрох учиртай юмсан.
Л.Сайнбаяр
Сэтгэгдэл (11)