Хүний хэтэвчин дэх мөнгийг тоолж, хөнжлийг нь сөхөх бол эрүүл сэтгүүл зүй яавч биш ээ. Гэвч энэ удаад сэтгүүл зүйн дээрх зарчмаас ухарч, БСШУС-ын сайд Ц.Цогзолмаагийн хөрөнгө, орлоготой зориуд танилцъя гэж бодлоо. Салбарын сайдаар томилогдохоосоо өмнө эрхэм гишүүн Ц.Цогзолмаа 129.7 сая төгрөгийн орлоготой, гурван орон сууцтай, 603 мянган төгрөгийн хадгаламжтай, “Lexus-570”, “Mercedes Benz” автомашинтай гэж АТГ-т хөрөнгө, орлогоо мэдүүлж байжээ. Бодвол энэ орлого нь сайд болсноос нь хойш нэмэгдээ биз. Яг хэд болсныг нь барим тавим нотолж чадахгүй ч, дориун хэмжээгээр өссөн байх гэж таамаглаж буйгаа тодотгоё. Яагаад гэвэл, эрхэм сайд Ц.Цогзолмаа хүсвэл хэнийг ч хөрөнгийг эрх мэдэлтнүүд булааж авах нь хэвийн үзэгдэл гэж бодож явдаг юм байна. Ийм ахархан бодолтой хүнд эрх мэдэл очсон болохоор л хөрөнгө нь өссөн байх гэж хардсан гэдгээ ч цохон тэмдэглэе.
БСШУС-ын сайд Ц.Цогзолмаа “Зууны мэдээ” сонинд ярилцлага өгөхдөө ам халсан уу, аль эсвэл “цайрсан уу” өөрийн бодлоо ний нуугүй ярьжээ. ХБНГУ-ын хөрөнгө оруулалттай “Турк” гэх тодотголтой сургуулиудын талаар тэрээр “...Турк улсын Засгийн газар шийдвэрээ гаргаад Монголд үйл ажиллагаа явуулж байгаа Турк сургуулиудыг Монгол Улсын Засгийн газарт хүлээлгэж өгвөл сургалтыг тасалдуулахгүйгээр авч явах бүрэн боломжтой. Мэдээж тэдгээр сургуулиуд Турк улсын хөрөнгө учраас бусдын хөрөнгөд Монгол Улс шууд халдаж болохгүй. Хуулийн гаргалгаагаа гаргаад бидэнд хуулийн дагуу асуудлаа тавибал шийдвэрлэж өгөхөд бэлэн байна...” гэж ярьсан байх юм.
Юу гэсэн үг вэ, Ц.Цогзолмаа сайд аа!? Хувийн өмчийг хоёр улсын Засгийн газар тохиролцчихвол нэг, нэгэндээ шилжүүлэх нь хэвийн үзэгдэл юм уу? 1992 оны шинэ Үндсэн хуулиар Монгол Улс өмчийн бүх хэлбэрийг хүлээн зөвшөөрч, хувийн өмчийг дээдэлсэн ардчилсан нийгэм байгуулаагүй хэрэг үү? Эрх мэдэлтнүүд хоорондоо тохиролцчихвол хувийг өмчийг дээрэмдэж авах нь Таныхаар шударга ёс, ардчилсан нийгэм мөн гэж үү? Энэ бүх асуултад эрхэм сайд Та юу гэж хариулах бол. Боловсролын сайд Танд ардчиллын талаархи боловсрол дутаад байгаа бол энгийншүүлж асууя л даа.
АТГ-т мэдүүлсэн таны хувийн “Lexus 570”, “Mercedes Benz” автомашиныг тань хоёр хүн тохиролцоод нэг, нэгэндээ бэлэг болгон өгөхийг Та зөвшөөрөх үү. Эсвэл Таны гурван орон сууцанд чинь гурван танихгүй хүн “Бид тохирчихсон юм” гээд нэг, нэгээрээ нүүгээд орчихвол Та зүгээр хараад суух уу? Магадгүй хадгаламжин дахь мөнгийг тань банк хураан авч, 129 сая төгрөгийн орлогыг чинь бусад хүн дур мэдэн зарцуулаад байвал Та сайшаах уу? Үгүй л болов уу. Учир нь энэ чинь улайм цайм дээрэм учраас Та хэзээ ч хүлээн зөвшөөрөхгүй. Энэ бүгд Таны хувийн өмч, таны бий болгосон баялаг учраас захиран зарцуулах эрх нь гагцхүү танд л хадгалагдаж байгаа. Өөрөөр хэлбэл, хувийн өмчийг хуулиар хамгаалах нь өөрөө хамгийн энгийнээр ардчилал юмаа. Монгол ардчилсан улс учраас, хувийн өмчийг хуулиар хамгаалдаг болохоор л Танд хүртэл АТГ-д мэдүүлэх хөрөнгө, орлого гэж байгаа юм шүү дээ, сайд минь!!!
С.Нацаг
Сэтгэгдэл (22)