2020 оны Токиогийн олимпод 3х3 сагсан бөмбөгийн төрөл шинээр нэмэгдэн орсон билээ. Уг төрөлд манай улсын баг өндөр амжилт үзүүлж байгаа. Өнгөрсөн хугацаанд манай шигшээ баг Азийн аварга, Азийн мөнгөн медаль, Их дуулга тэмцээнүүдэд өндөр амжилт үзүүлсэн. Маргааш эхлэх “Жакарта-2018” Азийн наадамд манай багийн хувьд медаль авах өндөр боломжтой хэмээн яригдаж байсан. Гэсэн ч өнөөдөр уг тэмцээнд явсан баг тухайн тэмцээнд оролцох боломжгүй гэсэн мэдээлэл гарсан билээ. Азийн наадамд U23 насны ангилал орох боломжтой гэсэн мэдүүлэг ирсэн ч манай багийн хувьд өнөөдөр мэдэж байгаа ажээ. Манай улсын хувьд “Монголын Сагсан бөмбөгийн холбоо”, “Монголын Үндэсний сагсан бөмбөгийн холбоо” гэсэн хоёр хэсэгт хуваагдаж үйл ажиллагаа явуулж байгаа. 3х3 төрөлд амжилттай оролцдог баг тамирчид УИХ-ын гишүүн С.Эрдэнээр удирдуулсан “Монголын Үндэсний сагсанбөмбөгийн холбоо”-ны үйл ажиллагаанд илүү идэвхтэй оролцдог. Мөн энэ баг тамирчдыг “MCS” групп ивээн тэтгэдэг.

Тэгвэл Азийн наадамд оролцох тамирчдыг өдий хүртэл бэлтгэл сургуулилт хийж мандат авах хүртэл энэ наадамд оролцуулж болно гэсэн энэ хариуцлагыг хэнд тооцох вэ? Уг нь олон улсын тэмцээн уралдаанаас өмнө Монголын Олимпийн хороонд тухайн тэмцээний удирдамж ирдэг. Энэ удирдамжийн дагуу л улсаа төлөөлөн оролцож буй тамирчдын мэдүүлгийг явуулах учиртай. Гэтэл Азийн наадам эхлэхэд ганцхан хоног дутуу байхад насны ангилал заасан байжээ, мэдүүлэг өгсөн тамирчид оролцох боломжгүй боллоо гэж мэдэгдэж байгаагийн хариуцлагыг хэн хүлээх вэ?  Монголын олимпийн хороо юу, Монголын сагсан бөмбөгийн хоёр холбоо юу? Эсвэл хоёр холбооны зөрчил тамирчдаа тэмцээнээс хасч, улсаа шившиглэх хэмжээнд очтолоо хурцадав уу?

Энэ талаар УИХ-ын гишүүн С.Эрдэнийн тэргүүлдэг “Монголын Үндэсний сагсан бөмбөгийн холбоо”-ны менежер С.Төгсжаргалаас тодруулахад, “Бидний хувьд энэ ангилалд оролцох тамирчдад насны хязгаар заасан гэдгийг өнөөдөр л мэдсэн. Монголын Олимпийн хорооноос энэ талаараа тайлбар хийнэ гэдэгт итгэж байна. Манай холбооны зүгээс нийт дөрвөн удаа мэдүүлэг өгсөн. Тамирчид бэртэж гэмтэх магадлалтай тул эхлээд зургаан тамирчны нэр өгөөд түүнээс хойш багасгаж эцсийн байдлаар дөрвөн тамирчны нэрээ өгсөн. Мөн Монголын Олимпийн хорооны дарга Д.Загджавд сагсан бөмбөгийн 3х3 төрөлд оролцох тамирчид 5х5 төрөлд ч мөн оролцох боломжтой гэж хэлсэн. Гэвч тэрбээр, “5х5 төрлийг Б.Тамирын холбоо буюу “Монголын сагсан бөмбөгийн холбоо” хариуцна, тиймээс танай холбоо 3х3 төрлөө л хариуц” гэж хэлсэн. Үүнд гомдолтой байгаа. Манай холбоо Азийн наадамд тамирчдаа оролцуулах бүхий л арга хэмжээг авч байна. Маргааш U23 насны тамирчдаа Жакарта руу нисгэх бодолтой байна” гэж хэллээ.

Мөн бид Олимпийн хорооноос мэдээлэл авахыг хүссэн боловч цаанаас ямар нэгэн тайлбар ирээгүй байгаа тул бидний зүгээс мэдээлэл өгөх боломжгүй гэсэн юм.

U23 насны тамирчдаар 3х3 мэдүүлгийг солих гэж ажиллаж байна гэсэн мэдээлэл байгаа бөгөөд энэ баг тамирчид "FIBA 3x3 U23 Nations League Stop 3-4" тэмцээнээс мөнгөн медаль хүртсэн.

“Жакарта 2018” Азийн наадмын 3х3 төрөлд манай улсаас Г.Цэнгүүнбаяр, Э.Дөлгөөн, Э.Цэрэнбаатар, Д.Дэлгэрням нар оролцохоор мэдүүлгээ өгөөд байв.

Манай баг өнөөдөр зохиогдох ФИБА 3х3 Европ тивийн мэргэжлийн гранпри тэмцээнд оролцоод Азийн аварга руу явна гэсэн хуваарьтай байжээ.

А.Болд