Баянгол дүүргийн Цагдаагийн 1, 2 дугаар хэлтэст тус дүүргийн Прокурорын газраас хяналт, шалгалт хийжээ. Тодруулбал, “Эрүүгийн хэргийн эд мөрийн баримт, барьцаа, хохирол төлүүлэхээр авсан мөнгө, валют, үнэт цаас, үнэт эдлэлийг мөрдөгч нараас хүлээн авах, хадгалах, шийдвэрлэх” ажиллагаа Эрүүгийн хэрэг хянан шийдвэрлэх тухай хууль болон Улсын Ерөнхий прокурорын баталсан заавар, журмын дагуу явагдаж байгаа эсэхэд шалгалт хийсэн байна.
Тус цагдаагийн хэлтсүүдийн эд мөрийн баримт хадгалах өрөө нь байгууллагын хонгилын өрөөнд байрладаг аж. Энэ нь Улсын Ерөнхий прокурорын өмнөх оны А/80 дугаартай тушаалын хавсралтаар батлагдсан “Эрүүгийн хэрэгт хөрөнгө, орлого, барьцааны мөнгө, эд мөрийн баримт, эд зүйлийг хураан авах, бэхжүүлэх, хүлээн авах, хадгалах, хамгаалах, шилжүүлэх, шийдвэрлэх журам”-ын 3.2 дахь хэсэгт заасан эд мөрийн баримтын өрөөний шаардлагыг хангахгүй байгаа юм. Тэсэрч дэлбэрэх, ууршиж дэгдэх, хүний амь бие, эрүүл мэнд, орчин тойронд аюул учруулж болохуйц хадгалалтын тусгай горим шаардсан эд зүйлсийг зориулалтын тусгай газарт хадгална гэснийг зөрчиж байгаа бөгөөд эд мөрийн баримтын өрөөнд түргэн шатаж дэлбэрэх бодис бүхий ахуйн газ нэг ширхэг баллонтой зохих журмын дагуу хадгалаагүй байна.
Эрүүгийн хэрэгт хураан авсан бэлэн мөнгө, валют, үнэт цаас, үнэт эдлэлийг байгууллагын няравт хүлээлгэн өгдөг байх бөгөөд нярав нь “Агуулахын бүртгэл”, “Кассын дэвтэр” зэрэг бүртгэлд бүртгэж байгаа нь шаардлага хангахгүй, камергүй хонгилын өрөөнд хадгалдаг байна.
“Эрүүгийн хэрэгт хөрөнгө, орлого, барьцааны мөнгө, эд мөрийн баримт, эд зүйлийг хураан авах, бэхжүүлэх, хүлээн авах, хадгалах, хамгаалах, шилжүүлэх, шийдвэрлэх журам”-ын тавдугаар зүйлд “Мөрдөн шалгах ажиллагаа явуулах байгууллагад хадгалагдаж байгаа эд мөрийн баримтыг устгах ажлын хэсгийг тухайн байгууллагын даргын тушаалаар байгуулна. Ажлын хэсэг нь улиралд нэгээс доошгүй удаа хуралдаж, эд мөрийн баримтыг эрүүгийн хэргийг шийдвэрлэсэн прокурорын тогтоолд заасны дагуу шийдвэрлэх ба ажлын хэсгийн шийдвэргүйгээр эд мөрийн баримтыг устгахыг хориглоно” гэсэн заалт хэрэгждэггүй зэрэг зөрчил дутагдал илэрчээ.
Шалгалтын дүнгээс гарсан зөрчил дутагдлыг арилгуулах, дахин гаргуулахгүй байхаар Баянгол дүүрэг дэх Цагдаагийн хоёрдугаар хэлтэст прокурорын шаардлага, Баянгол дүүрэг дэх Цагдаагийн нэгдүгээр хэлтэст зөрчил арилгуулах тухай албан бичгийг тус тус хүргүүлсэн байна.
Б.Лхам