УИХ-ын өчигдрийн нэгдсэн чуулганы үеэр УИХ-ын гишүүн О.Баасанхүүгээс авсан тодруулга хүргэж байна.
-Байхгүй гишүүдийн өмнөөс картыг нь хийж ирцэд оруулаад байна гэх мэдээлэл байна?
-Тэр мэдээлэл худлаа. Байгаагаар нь л ирцийг нь авч байгаа.
-УИХ-аар хэлэлцэх ёстой асуудал байхгүй байгаа юм уу. Гишүүд яагаад чуулганд оролцохгүй байгаа юм бэ?
-Би нэг л зүйлийг хэлж байгаа. Энэ бол МАН-ын зовлон гэж. Мөн төрийг барьцаалж байгаа хэлбэр, төрийн эрхийг хууль бусаар авах гэж буй завдал мэт харагдаж байна. Би энд яагаад эмзэгээр хандаж байна гэхээр бүдүүлгээр хэлэхэд "хөгшин хулгайч" гэж байгаа олон жил төр, засгийн суудалд зайдлаад суугаад авилга албан тушаалаа зарж идсэн нөхдүүд.
Жишээлбэл БОАЖЯ-д хүн баригдсан, хоригдсон гэдэг мэдээлэлд холбогдсон нөхдүүд, мөн саяын суулт хийгээд байгаа нөхдүүд бүгдээрээ эрүүгийн хэрэгт холбогдсон хавтастай, дугаартай, шагагдаж байгаа юм байна лээ.
Хэн нь хэнийгээ төрүүлж шорон руу чирч явах вэ гэдэг тэмцэл гэж би харж байгаа. Мөн ямар ч хэрэг хийгээгүй хүнд зохиомлоор хэрэг үүсгэж, ял хүртээж, гэр бүлээр нь барьж хорьж байгааг би шударга бусын хонгил гэж ойлгож байгаа.
Түүнээс биш хулгай хийсэн нэг нь нөгөө хулгай хийснээ барьж хорих гээд нөгөө хулгай хийсэн нь нөгөөдөхтэйгөө барьцаад сууж байгааг ямар хонгил гэх вэ. Хууль тэгш үйлчлэх ёстой. Хулгай хийсэн бол бүгд буруугаа үүрээд явах ёстой. Би хуулийн байгууллагад 20 гаруй жил ажилласан болохоор надад найз нөхдөөс албан бусаар мэдээлэл их ирдэг. ЖДҮДС-ийн зээлийг хуульч хүний хувьд тайлбарлахад гишүүний эхнэр нь ЖДҮДС-аас зээл аваад зориулалтаар нь зарцуулсан бол яая гэх вэ. Яая гэх вэ гэдэг нь ёсзүйгүй юм, эрүүгийн хэрэг биш юм гэж байгаа юм.
Гэтэл үүнийг аваад гурван янзаар хэрэглэсэн байна. Нэг нь тойргоосоо, найзаасаа ирсэн өргөдлийг нь хөөцөлдөж шийдвэрлэж өгөөд дундаас нь шагнал авсан байгаа юм. Гэхдээ Эрдэнэтийн иргэд 10, 20 сая төгрөгийн ЖДҮДС-ийн зээлд хамруулж өгөөч хэмээн надад ханддаг. Бид та нар үүнийг шийдэж өгөөч, бүр очоод наад хүнд чинь ажлын байртай болгох хэрэгтэй туслаач хэмээн ярьдаг. Энэ үүрэг юм чинь. Гэтэл дундаас нь 10, 20 хувийг нь аваад буюу 500 сая төгрөг зээлээд 56 сая төгрөг авсан байгаа юм.
Хоёрдугаарт хүний мөнгийг гурван хувийн хүүтэй аваад 50, 60 хувийн хүүтэй мөнгө угаагаад байгаа юм. Энд одоогоор гурван хүн мөнгө угаасан тодорхой болоод тэр гурван хүнийг сайдаа томилсны дараа оруулж ир гээд байгаа юм билээ. Сайд томилохын өмнө гурван хүнээ оруулж ирвэл кнопон дээр нь хуулийнхны улс төрийн хэмээн орох гээд байгаа юм билээ.
-Нэрийг нь тодорхой хэлж болох уу?
- Би худлаа яридаггүй. Хэвлэлд бичигдсэн зарим нэг хүний нэр нь үнэн байна лээ шүү дээ.
-Яг хэдэн хүн байгаа юм бэ?
-Одоогоор энэ гурван хүний нэр орж ирэхэд бэлэн болсон байна.
-Шалгагдаж байгаа гэсэн?
-Нийслэлийн Прокурор дээр яллах дүгнэлт үйлдсэн юм билээ. Үүнийг УИХ-д өгөх гэж байгаа юм билээ. Би Ерөнхий Прокуророос “Хэвлэлийнхэн асуугаад байна яг хэзээ оруулж ирэх юм бэ” хэмээн асуусан. Тэгсэн сайдыг нь томилохыг хүлээе. Тэгэхгүй бол төр гацааж байгаа юм шиг болно. Нэгэнт нотлогдсон зүйл учир бид эргүүлэн татах бичиг өгөх гэж байгаа” гэсэн.
-Эргүүлэн татах бичиг өгөх УИХ хүлээж авдаггүй шүү дээ?
-Эд чинь барьцаалагдсан хүмүүс учир шүүрхий шанага шиг бүгд гоожих гээд байгаа шүү дээ. Энд нарийн дүгнэж үнэнийг ярих юм бол 24 хүн гэмт хэрэгт шууд болон шууд бусаар холбогдчихоод байгаа юм.
-24 гишүүн гэж ойлгож болох уу?
-Гишүүн болон гишүүний хамаарал бүхий хүмүүс. Төмөр замын, утааг шийдэх гэх мэт асуудалтай холбоотой хүмүүс. БОАЖ-ын сайдтай холбоотой янз бүрийн мэдээлэл яваад л байна. Хуулийнхаа асуухад үндэслэлтэй юм шиг ярьж байна лээ.
-УИХ-ын даргад тавьсан гишүүдийн шаарлагыг та юу гэж харж байна?
-Яах гэж өөрсдөө томилсон юм бэ. Өөрсдөө томилсон шүү дээ. Авилгатай тэмцэх газрын дарга, УИХ-ын дарга хоёрыг энэ 65 томилсон шүү дээ. Томилчихоод одоо больё гээд хүүхэд шиг зүйл яриад байх юм. Нөгөөдөх нь ч сайн дураараа болих л хэрэгтэй. Заавал би хийнэ гээд байх шаардлагагүй шүү дээ. УИХ гэдэг албан тушаал мөн.
-Ямар үндэслэлээр чөлөөлөх ёстой гэж?
-Ганцхан зүйл байгаа шүү дээ. Нэг нь өөрийн саналаар нөгөө нь хуулиар суудлаасаа түдгэлзэж болно. Хуулиар огцруулах талаар хэн ч бичиг өгөөгүй юм билээ.
Р.Хишигжаргал
Сэтгэгдэл (11)