Ерөнхий сайд У.Хүрэлсүх арванхоёрдугаар сарын 12-16-ны өдрүүдэд Япон улсад айлчлах тов гарчээ. Энэхүү айлчлал нь Ерөнхий сайд У.Хүрэлсүхийн гадаадын улсад хийж буй албан ёсны дөрөв дэх айлчлал. Ерөнхий сайд энэ онд БНСУ, БНХАУ, АНУ-д албан ёсны айлчлал хийгээд байгаа юм.
Ерөнхий сайдын Япон улсад хийх айчлалаар хоёр орны харилцаа, хамтын ажиллагааг бататгах, нийгэм эдийн засгийн харилцаагаа сайжруулахад чиглэсэн гэрээ хэлэлцээрт гарын үзэг зурах аж.
Өнгөрсөн хоёрдугаар сард Гадаад харилцааны сайд Д.Цогтбаатар Япон улсад айлчлах үеэр Японы Гадаад хэргийн сайд Т.Коно Японы Засгийн газар Монголын хөдөө аж ахуйн салбарт нэмүү өртгийн үйлдвэрлэлийг хөгжүүлэхэд чиглэсэн Мастер төлөвлөгөөг боловсруулахаар шийдвэрлэснийг дуулгасан билээ.
Мөн сайд Д.Цогтбаатар айлчлалын үеэр хоёр улсын иргэд хэтдээ визгүй зорчих нөхцөлийг бүрдүүлж ажиллахыг чухалчилж, талууд иргэд зорчих нөхцөлийг хөнгөвчлөх, иргэдийн эрх ашгийг хамгаалах асуудлаарх ГХЯ-ны Консулын газар хоорондын зөвлөлдөх механизмыг бүрдүүлж, хамтран ажиллахаар болсон.
Ерөнхий сайдын айлчлалын үеэр хоёр улсын иргэдийн визний асуудлаар яриа хэлэлцээр хийж магадгүй юм. Монгол Улсаас Япон улсад 8000 гаруй иргэн ажиллаж, амьдардаг гэсэн статистик байдаг.
Монгол, Японы хооронд эдийн засгийн түншлэлийн хэлэлцээр байгуулж, 2016 оноос хүчин төгөлдөр мөрдөгдөж эхлээд байгаа юм.
Хэлэлцээр заасны дагуу Монголоос 9300 гаруй бараа бүтээгдэхүүнийг харилцан импортын татвараас шууд болон үе шаттай чөлөөлөхөөр болсон. Гэхдээ хэлэлцээр хүчин төгөлдөр болоод хоёр жил болсон ч Япон руу хийх худалдааны эргэлт төдийлөн сайн нэмэгдээгүй байгаа билээ. Хэлэлцээрт заасан бүтээгдэхүүний жагсаалт болон чанар стандартын журамд өөрчлөлт оруулах Япон улстай хийх худалдааны эргэлтийг нэмэх шаардлага байгааг мэргэжилтнүүд болон ААН-үүд хэлдэг билээ.
Сэтгэгдэл (14)