Энэ сарын 8-нд Хөвсгөл нуурын мөсөн дээгүүр зорчиж явсан “Лексус-470” загварын суудлын автомашин мөсөнд цөмөрч усанд живжээ. Автомашинд зорчиж явсан таван иргэн ямар нэгэн гэмтэл аваагүй гэдгийг онцгой байдлаас мэдээллээ. Дуудлагын дагуу Хөвсгөл  аймгийн Онцгой байдлын газрын 11 алба хаагч, хоёр автомашинтай нуурын усанд живсэн автомашиныг татан гаргахаар 30 метрийн гүнд хоёр удаагийн шумбалт хийхэд автомашин дотор шороо хайрга их хэмжээгээр орсон байжээ. Түүнчлэн автомашин доторх эд зүйлсийг хайх боломжгүй учраас жолоочийн хүсэлтээр аврах ажиллагааг зогсоосон байна.

Цаг уурын байгууллагын ирүүлсэн мэдээллээр нэгдүгээр сарын сүүлийн арав хоногийн байдлаар Монгол орны ихэнх гол мөрөнд тогтвортой мөсөн бүрхүүл тогтсон хэдий ч нуурын толио болон голын нийт уртын дагууд мөсний зузаан харилцан адилгүй байгаа юм.

Иймд мөсний даац хүн, мал, машин тэрэг явахад аюулгүй хэмжээнд хүрч бэхжээгүй байгаа тул цаг хожих, зам товчлох зэргээр мөсөн дээгүүр явах, авто тээвэр хийхгүй байхыг Онцгой байдлын ерөнхий газраас анхааруулж байна.