Нийслэлийн ИТХ-ын Тэргүүлэгчдид өчигдөр хуралдлаа. Хуралдаанаар Улаанбаатар хотын 380 жилийн ойг тэмдэглэн өнгөрүүлэх ажлыг удирдан зохион байгуулах хорооны үйл ажиллагааны талаар ярилцсан юм.

Энэ онд нийслэлийн 380 жилийн ойг тэмдэглэн өнгөрүүлэхэд хоёр тэрбум төгрөг зарцуулахаар төлөвлөжээ. Энэ хүрээнд зургаан бүлгийн 114 арга хэмжээ зохион байгуулах аж.

Тодруулбал, нийслэлийн иргэдэд хандсан 10, бүтээн байгуулалт 26, соёл урлаг 36, ёслол хүндэтгэлийн 39 арга хэмжээ зохион байгуулахаар төлөвлөгөө гаргажээ. Мөн хотын тохижилтод онцгойлон анхаарч, олон улсыг хамарсан урлагийн тэмцээн зохион байгуулах юм байна. Түүнчлэн дүүрэг, хорооны орчны тохижилт, цэвэрлэгээтэй холбоотой уралдаан зохион байгуулах аж.

Ингээд тэргүүлэгчид ажлын хэсгийн төлөвлөгөөний төсөлтэй холбогдуулан асуулт асууж, хариулт авлаа.

Тэргүүлэгч  Н.Батсүмбэрэл: “380 жилийн ой бусад тэмдэглэлт арга хэмжээнээс ямар онцлогтой вэ. Ойн хүрээнд сард 1-2 ажил хийнэ гэж байна. Өнгөрсөн хоёр сарын хугацаанд ямар ажил хийсэн бэ. Нийслэл хот 152 хороотой. Гэтэл арга хэмжээнд 10 хороог л хамруулсан байна. Хэн гэдэг төлөөлөгчийн санал вэ?

Ш.Анхмаа: Харьяа газруудаас санал авсан. Хотын ирээдүйн төлөвлөлт, тогтвортой хөгжлийн зорилгод нийцүүлсэн онцлогтой. Олон санал ирүүлснээс шүүж, төлөвлөгөө гаргасан юм. Мөн баяр наадмын тоглолтыг цомхон болгож, бага төсөвт багтааж хийхээр болж, нийгмийн хөгжил тал руу олон ажил хийхээр төлөвлөсөн.

Тэргүүлэгч Б.Батнасан: Дүүргүүдэд яг ямар ажил хийх юм бэ. Төсөвлөсөн хоёр тэрбум төгрөгийн хэдэн хувийг бүтээн байгуулалтад зарцуулах юм. Төсвийн задаргаа байна уу?

Ш.Анхмаа: Бүх дүүрэгт цэцэрлэгт хүрээлэн байгуулна.

Нийслэлийн Засаг даргын Тамгын газрын дарга М.Отгонбаяр: Нийслэлийн ойг тэмдэглэх ажлын хүрээнд эрдэмтэн судлаачдын дунд нийслэлийн түүхтэй холбоотой эрдэм шинжилгээний хурал зохион байгуулж, иргэдэд танилцуулахаар төлөвлөсөн.

Нийслэлийн ИТХ-ын дарга С.Амарсайхан: Тогтмол зохион байгуулдаг ажлыг ой тэмдэглэн өнгөрүүлэх ажлын жагсаалтад оруулсан байна. Ямар учраас оруулсан юм бэ. Гэрлэн дохио байгуулах, замын тэмдэглэгээ тавих, ЕБС-ийн цайны газрын үйл ажиллагаанд хяналт тавих, сургалтын чанарыг дээшлүүлэх, автобусны буудлын жишиг зогсоол байгуулах зэрэг бол байнга хийх ёстой ажил. Эдгээрийг заавал оруулах ёстой юм уу? 

Ш.Анхмаа: Бид өмнө нь байгаагүй амжилтаа ахиулахаар арга хэмжээнд оруулсан. Нийслэл сургалтын чанараараа улсын хэмжээнд есдүгээрт жагсдаг байсныг өнгөрсөн хугацаанд долдугаарт эрэмблэгддэг болгож ахиулсан. Энэ үр дүнг ахиулахын тулд сургууль боловсролын байгууллага руу хандсан ажлуудыг оруулсан юм.

Төлөөлөгчид хариулт авч дууссаны дараа НИТХ-ын дарга С.Амарсайхан нийслэлийн 380 жилийн ойг тэмдэглэн өнгөрүүлэх Ажлын хэсгийн төлөвлөгөөнд хурлаар хэлэлцэгдсэн асуудлыг дахин тусгаж,  Тэргүүлэгчдийн дараагийн хурлаар дахин танилцуулахыг үүрэг болгож чиглэл өглөө.

Б.Лхам