ШӨХТГ-аас цаг үеийн асуудлаар мэдээлэл хийлээ.
Хэрэглэгчийн эрхийг хамгаалах газрын дарга С.Цэрэндулам “Хоёрдугаар сарын 13-ны өдөр агентлагийн даргын өгсөн чиглэлийн дагуу хэрэглэгчийг хохиролгүй болгох тухайн зөрчил дутагдалд холбогдох хуулийн хариуцлага хүлээлгэх зорилгоор ажлын хэсгийг байгуулж хяналт, шалгалт хийсэн. Ажлын хэсэг МХЕГ, НМХГ, ХСҮТ-өөс хариу,тайлбарыг авсан. Хэрэглэгчийн эрхийг хамгаалах тухай хуулийн 10.12.1-д Үйлдвэрлэгч, худалдагч, гүйцэтгэгчийн зах зээлд нийлүүлж байгаа бараа, ажил, үйлчилгээ нь хэрэглэгчийн амь нас, эрүүл мэнд болон хүрээлэн байгаа орчинд гэм хор учруулахгүй байх заавал мөрдөх ёстой стандартын болон техникийн зохицуулалтыг хангасан байх ёстой” гэсэн заалт бий. Мөн 10.12.6-д Үйлдвэрлэгч, худалдагч, гүйцэтгэгч барааны аюулгүй байдлын шаардлагыг хангаагүйгээс хэрэглэгчийн эд хөрөнгө, хүрээлэн буй орчинд учирсан гэм хорыг хуульд заасны дагуу арилгана гэсэн заалт байдаг. Мөн Зөрчлийн тухай хуулийн 10.2.5 дахь заалтыг хангуулахаар ажиллаж байна. Өчигдөр манай ажлын хэсэг Халдварт судлалын үндэсний төвд ажиллаа. Тус төвд хоёрдугаар сарын 19-ны 15.00 цагт нийт 247 хүн хандсан. Үүнээс нийт 44 хүн хэвтэн эмчлүүлснээс 24 хүүхэд, 20 том хүн байна. Мөн үүнээс гадна “Долоон одой” хувийн эмнэлэгт нэг хүн хэвтэн эмчлүүлсэн мэдээлэл ирсэн. Хоёрдугаар сарын 18-ны өдөр дахиад хоёр хэрэглэгчээс гомдол ирсэн. Гомдолд “KFC түргэн хоолны газраар хоёрдугаар сарын 9-ны өдөр үйлчлүүлсэн. Үүнтэй холбоотойгоор хохирсон хохирлыг барагдуулж өгнө үү” гэсэн. Бид гомдлын дагуу ажилласан.
Энд хэд хэдэн анхаарвал зохих зүйл байна. Тухайн зөвшөөрөл олгож буй байгууллагуудын үйл ажиллагаанд хяналт тавих хэрэгтэй байна. Тухайлбал, Зайсан-KFC салбарын хувьд тухайн дүүргээсээ зөвшөөрөл авч ажилладаг. Дүүрэгтэй гэрээ байгуулдаг. Иймээс ШӨХТГ-аас хоёр асуудалд анхаарч ажиллах хэрэгтэй гэсэн байр суурьтай байна.
Үүнд худалдаа үйлчилгээнд тусгай зөвшөөрөл олгодог байгууллага гэрээний хэрэгжилт, биелэлтэд анхаарч ажиллах хэрэгтэй. Мөн хяналт тавьдаг төрийн болон бүх шатны байгууллага хяналт тавьж ажиллах хэрэгтэй байна. Түүнчлэн “Таван Богд Фүүдс” компани тухайн салбарын хүрээнд үйл ажиллагааг нь хаах алдаа засах гэхээс илүүтэй хариуцлагагүй ажилласнаас болж хохироосон үйлчлүүлэгчдийн хохирлыг бүрэн барагдуулж, үйл ажиллагаанд анхаарч ажиллах хэрэгтэй. Хэрвээ хохирогч гомдол гаргахыг хүсвэл бид тодорхой хэмжээнд ажиллана” гэлээ.
Р.Хишигжаргал
Сэтгэгдэл (3)