Захиргааны ерөнхий хуулийн 27 дугаар зүйлийн 27.4.3 дахь заалтын дагуу сонгуулийн зардлын дээд хэмжээг дахин шинэчлэн тогтоох талаарх сонсох ажиллагаа маргааш өдрийн 09.30 цагт явагдахаар боллоо.
Тодруулбал, Сонгуулийн тухай хуулийн 41 дүгээр зүйлийн 41.1, 41.2 дахь хэсэгт сонгуулийн тойрогт нэр дэвшигчээс болон сонгуульд нам, эвслээс зарцуулах зардлын хэмжээг Төрийн аудитын дээд байгуулагаас тогтоохоор зохицуулсан байдаг.
Уг зохицуулатын хүрээнд Үндэсний аудитын газраас Улсын Их Хурлын сонгуулийн 42 дугаар тойргийн нутаг дэвсгэрийн хэмжээ, байршил, сонгогчийн тоо болон Улсын Их Хурлын 2016 оны ээлжит сонгууль, Ерөнхийлөгчийн 2017 оны ээлжит сонгуульд оролцсон нам, эвсэл, нэр дэвшигчээс зарцуулсан сонгуулийн зардлын гүйцэтгэл, тухайн үед Төрийн аудитын дээд байгууллагаас тогтоосон зардлын дээд хэмжээ зэргийг харгалзан тус нөхөн сонгуульд нам, эвсэл, нэр дэвшигчээс зарцуулах зардлын дээд хэмжээг тогтоохоор ажиллаж байгаа юм байна.
Дээрх үйл ажиллагаанд оролцохдоо нэр дэвшигч өөрөө болон нам, эвслээс тухайн асуудлаар санал гаргах эрх бүхий албан тушаалтныг оролцуулах аж.
Түүнчлэн Захиргааны ерөнхий хуулийн 17 дугаар зүйлд заасны дагуу сонсох ажиллагаанд нам, эвслийн дарга болон нэр дэвшигч өөрөө хүрэлцэн ирэх боломжгүй тохиолдолд төлөөлөгчид Иргэний хуулийн 64 дүгээр зүйлийн 64.2-т заасан шаардлагыг хангсан итгэмжлэлтэй ирүүлэх юм байна.
Б.Жаргал