БСШУС-ын сайд асан Ц.Цогзолмаагийн зөвлөхийн суудлаас Анагаахын шинжлэх ухааны үндэсний их сургуулийн захирлын сэнтийд тухалсан Ж.Цолмонгийн хууль бус шийдвэр эрүүл мэндийн салбарт зүтгэж яваа мянга мянган багш, ажилчдын эгдүүцлийг төрүүлээд байна. Учир юу гэвээс, хувь хүн өөрийн үзэл бодлоо илэрхийлэх нь монголчууд бидэнд Үндсэн хуулиар олгогдсон эрхэм дээд эрхийн нэг байлтай. Гэтэл тус сургуулийн Био-анагаахын сургуулийн Бичил амь, дархлаа судлалын тэнхимийн профессор С.Цогтсайхан АШУҮИС-ын байранд CIRCLE сүлжээний салбарыг нээх гэж буйд сэтгэл дурамжхан байгаагаа илэрхийлж, жиргэснийх нь төлөө ажлаасаа халагдсан байх юм.
Профессор С.Цогтсайхан бол анагаах салбарт насаараа зүтгэж яваа эрдэмтэн. Ийм хүн хүн зоны эрүүл мэндийн төлөө өөрийн үзэл бодлоо илэрхийлэх бүрэн эрхтэй. Энэ ч утгаараа тэрбээр “Сургуулийн маань “холл” гоймонгийн газар болж байгаа юм байна. Анагаахын сургууль шүү дээ. Эрүүл хооллолт талаас нь харвал хэр оновчтой шийдэл вэ. Тэгээд ч энэ холлд постерийн үзэсгэлэн, номын худалдаа гэх зэрэг олон эвэнт болдгийг санаж байгаа байлгүй" хэмээн жиргэснийх нь төлөө энэ сарын 19-нд Удирдах зөвлөлийн багшийн төлөөллөөс чөлөөлөх тушаалыг Ж.Цолмон захирал гаргасан байна.
Ж.Цолмон бол эрүүл мэндийн чиглэлээр гадаад, дотоодод суралцсан чамгүй боловсон хүчин. Гэвч анаагахын салбарт ажиллаж, эмч, ажилчдын жаргал, зовлонг амтлахаас илүүтэй улстөрчидтэй сүлбэлдсэн нь давамгайлсан байх. Энэ ч утгаараа улс төрийн бохир тоглоомоор ажил хэрэг явуулдаг арга барилаар анагаахын сургуулийг самарч суугаа байгаа бололтой юм.
Эцэст нь хэлэхэд Ж.Цолмон захирал аа, жиргэлээ гээд суудлаасаа хусуулах нь эрүүл нийгмийн шинж биш. Наад бохир тоглоомоороо улс төрийн талбартаа тогло. Анагаахын сургууль, тэр тундаа эрүүл мэндийн салбарт таны хууль бус шийдвэр илүүдэнэ үү гэхээс дутахгүй шүү гэдгийг сануулчихая.
Г.Нацаг-Эрдэнэ
Сэтгэгдэл (44)