Сүүлийн үед зарим хэвлэл мэдээллийн хэрэгслээр, тэр дундаа нийгмийн сүлжээн дэх ил эзэнгүй хаягуудаар манай байгууллагын болон гүйцэтгэх удирдлагын нэр хүндэд халдсан, гутаан доромжилсон, үнэнд үл нийцэх мэдээ, мэдээлэл, захиалгат нэвтрүүлгүүд цацагдаж байгаад  МҮХАҮТ-ын зүгээс гүнээ харамсч байна.

МҮХАҮТ-ын ээлжит ХХ их хурал 2019 оны 2 дугаар сарын 28-ны өдөр хуралдахаар товлогдсон. Энэ их хурлаар Танхимын гишүүн байгууллагуудын төлөөлөгчид хуран чуулж, Танхимын 2015-2018 оны ажлын тайлангаа тавьж, ирэх дөрвөн жилийн үйл ажиллагааг үргэлжлүүлэн авч явах шинэ удирдлагыг сонгох болно.

Танхимын Удирдах зөвлөлийн дарга болон Танхимын даргад өрсөлдөхөөр санаархаж байгаа зарим нэг хүмүүс ийм увайгүй, явуургүй, бохир бүдүүлэг аргыг хэрэглэж олон нийтийг төөрөгдүүлэн, тус байгууллагад ажиллаж буй 90 гаруй ажилтны ажил хэргийн нэр хүндэд халдаж, үйл ажиллагааг бүхэлд нь харлуулах гэсэн өчүүхэн санааг агуулжээ.

МҮХАҮТ бол улс төрөөс ангид, бие даасан олон нийтийн байгууллага бөгөөд тус байгууллагын удирдлагад багтах гэсэн зарим нэг ичгүүр сонжуургүй нөхдүүд шударгаар өрсөлдөж сонгуульд оролцохын оронд ийм бусармаг үйлдэл хийж байгааг Танхимын зүгээс эрс эсэргүүцэж, энэхүү ташаа мэдээллийг олон нийтэд түгээж буй нэр бүхий байгууллага, хэвлэл мэдээллийн хэрэгслийг холбогдох хууль хяналтын байгууллагад шалгуулж, нэр төрөө сэргээлгэхээр хандсан болохоо үүгээр мэдэгдэж байна.

Энэ өдрүүдэд хуралдахаар товлогдсон МҮХАҮТ-ын ХХ их хурлын үйл ажиллагаанд энэ мэтчилэн хөндлөнгөөс нөлөөлөх гэсэн аливаа оролдлогуудыг бид хүлээн зөвшөөрөхгүй бөгөөд энэхүү явуургүй үйл ажиллагаагаа таслан зогсоохыг холбогдох этгээдүүдээс шаардаж байна.

Өнгөрсөн 4 жилд илүү нээлттэй ажиллан, Удирдах зөвлөлөөрөө төсвөө батлуулж, зарцуулалтыг ил тод тайлагнан, Тэргүүлэгчид, Хяналтын зөвлөл болон Хөндлөнгийн аудитаар үйл ажиллагаагаа шалгуулсаар ирсэн МҮХАҮТ-ыг гэмт хэргийн уул уурхай болсон хаалттай байгууллага мэтээр зориуд харлуулж, эрүүл саруул хүний ой тойнд багтамгүй, хэн ч итгэх аргагүйгээр гутаан доромжлох эрх хэнд ч байхгүй гэдгийг хатуу анхааруулж байна.

МОНГОЛЫН ҮНДЭСНИЙ ХУДАЛДАА АЖ ҮЙЛДВЭРИЙН ТАНХИМ