ОХУ-ын Москва хот 2030 онд хүндийг өргөлтийн дэлхийн аварга шалгаруулах тэмцээнийг зохион байгуулна. Энэ нь ОХУ Украинд халдан довтолсон 2022 оноос хойш олимпын спортын төрлөөр дэлхийн аварга шалгаруулах тэмцээн зохион байгуулах эрхийг олон улсын холбооноос авсан анхны тохиолдол болж байна. Олон улсын хүндийг өргөлтийн холбоо (IWF) аравдугаар сарын 25-нд энэ шийдвэрийг танилцуулжээ.

Мөн 2029 оны дэлхийн аварга шалгаруулах тэмцээнийг Энэтхэгийн Ахмедабад хотод зохион байгуулахаар болсон байна. Москва хамгийн сүүлд 1983 онд буюу ЗХУ-ын үед хүндийг өргөлтийн дэлхийн аваргыг хүлээн авч байжээ.

Олон улсын олимпын хороо (ОУОХ) энэ оны долоодугаар сард Оросын олимпын хороонд тавьсан түдгэлзүүлэлтийг түр цуцалсан нь тус улсын олон улсын спортод эргэн нэгдэх үйл явцыг хурдасгасан юм. Үүний дараа Орос, Беларусийн хүндийг өргөлтийн тамирчдыг олон улсын тэмцээнд оролцохыг зөвшөөрчээ.

Гэхдээ Оросын тамирчид ирээдүйн олимпын наадамд улсынхаа далбаа, төрийн дуулалтай оролцох эсэх нь одоогоор тодорхойгүй байна. Украины Үндэсний олимпын хороо ОУОХ-ны шийдвэрийг эсэргүүцэн Спортын арбитрын шүүхэд гомдол гаргажээ.

Оросын спортын олон улсын тавцанд эргэн ирэх асуудал допингийн маргаантай мөн холбоотой хэвээр байна. Тус улсад системтэй допинг хэрэглэсэн, зөрчлийг нуун дарагдуулсан гэх асуудал өмнө нь олон улсын байгууллагуудын шалгалтаар илэрч байв. ОУОХ-ноос олон улсын тэмцээнд эргэн оролцож буй Оросын тамирчид допингийн эсрэг холбогдох шаардлагыг заавал биелүүлэх ёстойг мэдэгдсэн байна. Ийнхүү Москва дэлхийн аварга шалгаруулах тэмцээн зохион байгуулах эрх авсан нь Оросын спортын олон улсын харилцаанд эргэн нэгдэх үйл явцын чухал алхам болж байна.

Л.Баяр