Бразилын Ерөнхийлөгч Луис Инасиу Лула да Силва аравдугаар сарын 25-нд болсон сонгуулийн хоёр дахь шатанд ялалт байгуулж, дөрөв дэх удаагаа төрийн тэргүүнээр сонгогдлоо. Гэвч түүнийг улс төрийн гүн хуваагдалтай нийгэм, сөрөг хүчний давамгайлалтай парламент болон эдийн засгийн хүндрэл хүлээж байна.
80 настай Лула да Силва барууны үзэл баримтлалтай сенатор Флавио Болсонаруг ялснаар Бразилын түүхэнд дөрвөн удаа ерөнхийлөгчийн сонгуульд ялалт байгуулсан улс төрч болов. Тэрбээр ядуурал, нийгмийн тэгш бус байдлыг бууруулах, ажил эрхлэлтийг нэмэгдүүлэх бодлогоо үргэлжлүүлэхээ амласан юм.
Харин сонгуулийн дүнгээр тус улсын нийгэм улс төрийн үзэл баримтлалаар гүн хуваагдсан хэвээр байгааг харууллаа. Болсонаруг дэмжигчид сонгогчдын 48 гаруй хувийг бүрдүүлсэн бөгөөд түүний төлөөлж буй барууны улс төрийн хөдөлгөөн нөлөөгөө хадгалж үлджээ.
Лула да Силвагийн өмнө тулгарч буй гол бэрхшээл нь сөрөг хүчний нөлөө бүхий парламенттай хамтран ажиллах явдал юм. Бразилын парламент ардчилалд шилжсэнээс хойших хамгийн консерватив бүрэлдэхүүнтэй болсон тул ерөнхийлөгчийн эдийн засаг, нийгмийн бодлогыг хэрэгжүүлэхэд хүндрэл учирч болзошгүй.
Түүнчлэн улсын өр дотоодын нийт бүтээгдэхүүний 82 хувийг давж, зээлийн өндөр хүү болон өрхийн өр нэмэгдсэн нь эдийн засагт дарамт болж байна. Ирэх онд эдийн засгийн өсөлт 2.3 орчим хувьтай байх төлөвтэй байгаа аж.
Гадаад бодлогын хувьд Лула да Силва АНУ-ын Ерөнхийлөгч Дональд Трампын засаг захиргаатай харилцаагаа зохицуулах шаардлагатай. Түүний ялалт нь Латин Америкт барууны үзэлтэй засгийн газруудын нөлөө нэмэгдэж буй энэ үед бүс нутгийн улс төрийн тэнцвэрт байдалд нөлөөлөхөөр байна. Лула да Силвагийн шинэ бүрэн эрхийн хугацаа 2027 оны нэгдүгээр сард эхэлнэ. Тэрбээр улс орноо нэгтгэх, эдийн засгаа тогтворжуулах, парламенттай зөвшилцөх зэрэг томоохон сорилттой нүүр тулах юм.
Л.Баяр
