Өнөөдөр МҮХАҮТ-ын ерөнхийлөгчийг сонгох XX их хурал болно. Дөрвөн жилд нэг удаа болохдоо нам гүмхэн зохиогдож, тэр хэрээрээ танхим даргалах хүнээ сонгочихдог байсан бол энэ удаагийн сонгууль УИХ-ын нөхөн сонгуулийн хэмжээнд цар хүрээ хамарч буй. Учир нь танхимын ерөнхийлөгчийн суудлаас УИХ-ын гишүүний сэнтийд заларсан С.Дэмбэрэл гишүүний замнах боломжийг нэмдэг болохоор тэр болов уу. Нөгөөтэйгүүр, нийгэм, эдийн засаг болоод улс төрд өрнөж буй үйл явдалтай салшгүй холбоотой юм.

Учир нь таван жилийн өмнөх эдийн засгийн өсөлт хасах бланс руу шилжих болсноор хувийн хэвшлийн салбарынхан уналтад орсон. Энэ цаг үед хувийн секторыг аврах гэж төрөөс багагүй зохицуулалт хийсэн нь амжилт дагуулаад буй. Хэдийгээр дэлхийн зах зээл дээр эрдэс баялагын салбарын түүхий эдийн ханш өсссөн Монголын эдийн засаг сэхээнээс гарах суурь болсон гэж үзэж байгаа ч нөгөөтэйгүүр хувийн секторын өөрсдийнх нь хүчин чармайлт багагүй байсан нь үнэн юм. Тиймдээ ч уналтад орсон танхимыг аварч, төр хувийн хэвшлийн салбарыг холбогч гүүрийн баганыг амжилттай босгож чадвал УИХ-ын ирэх сонгуулийг горьдох боломжтой болно. Тэгвэл энэ их боломжийг атгах азтай аавын хүү хэн боолх бол.

Энэ сарын 26-ны өдөр сунгаанд оролцох хүсэлтэй иргэд шийдвэрээ эцэслэж, материалаа бүрдүүлэх учиртай байсан. Танхимаас өгсөн мэдээллээр “Ард”-ын Ч.Ганхуяг, “Буян”-гийн Б.Жаргалсайхан, “Урбанек”-ийн Б.Лхагважав, “Увс хүнс” группийн ерөнхийлөгч О.Амартүвшин нар өрсөлдөхөөр мэдүүлгээ өгсөн байсан. Гэтэл өчигдрийн байдлаар дахин нэг нэр дэвшигч тодорсон гэх мэдээлэл бий. Тэр нь “Өгөөж”-ийн Түмэнгэрэл.

Ямартай ч Монголдоо нэр хүндтэй таван компанийн тэргүүнүүд ийн нэгэн дээвэр дор цугларлаа. Тэдний хэн нь ерөнхийлөгч болохыг танхимын гишүүнчлэлтэй 500 гаруй төлөөлөгч өнөөдөр сонгоно. Нийгмийн дунд тэдний талаар янз бүрийн сэтгэгдэл хөвөрч буйгаас харахад таван битүү нэр дэвшигч гээд хэлчихэд буруудахгүй болов уу.

Жилийн дөрвөн тэрбум төгрөг захиран зарцуулах эрхийн төлөөх марафоны ялагчаар хэн тодрох бол.

Г.Алимаа