Нэр төртэй төрийн түшээ, сайд Архайтай хөрөг ярилцлага хийхээр тохирсон сэтгүүлч бүсгүй Итгэл сайдын гэрт очиж буйгаар энэхүү жүжиг эхэлнэ. Аав ээж, нутаг ус, амьдралын замналаа Архай сайд Итгэлтэй илэн далангүй хөөрөлдөж сэтгэл уярам түүхийг өгүүлнэ. Гэвч тэдний энэ удаагийн уулзалт сайдын гэрт гэнэтийн зочид ирэх сургаар аргагүйн эрхэнд тасалдахад хүрч ярилцлагаа маргаашийн өдрийг хүртэл түр хойшлууллаа.
Маргааш өдөр нь Итгэл сайдын гэрт дахин зочилоход өчигдөр өөртэй нь уулзсан тэр хүн төрөл арилжсан мэт өөрчлөгдсөн байх нь тэр. “Ийм л хүн түмэн олны итэлийг дааж төрийн түшээ бололгүй ч яахав дээ” гэж бодож байсан Итгэлийн урам зориг, бахархал, хүндлэл салхинд туугдах мэт хийсэн одож, Архай сайдын ярьж хэлсэн бүрийн алинд нь чухам “үнэн” оршиж байгааг тааварлаж мэдэхийн эцэсгүй байдалд оруулж, энэ хүн чухам хэн юм бэ? гэсэн эцэс төгсгөлгүй таавар тайлалын өмнө түүнийг аваачив. “Нууц” нь, “Үнэн” нь хаана байсныг жүжгийн өрнөлөөс толидоорой…
“Бүсгүйн зурвас” хэмээх энэхүү жүжигт хүний мөн чанар, ёс зүй, үнэ цэнэ, хайр сэтгэл, итгэл үнэмшил
хийгээд өнөө цагийн нийгмийн хүрээн дэхь ил далд оршин байх олон асуудлыг хөндөн өгүүлэх болно.
"Бүсгүйн зурвас" жүжгийн гол дүрийг бүтээсэн жүжигчин Б.Золзаяагаас тодрууллаа
-Та “Бүсгүйн зурвас” жүжгийн гол дүрийг бүтээлээ. анхны гол дүрээ бүтээсэнд тань баяр хүргэе?
-Баярлалаа. Яг энэ агшинд сэтгэл догдолж, тэр хэрээрээ айдсаар дүүрэн байна. Дүрдээ орохын тулд маш их хөдөлмөрлөж, хичээж ажилласан. Цаашид тайз, дэлгэцийн олон сайхан дүрүүдэд амилуулахыг хүсч байна.
-Таны бүтээсэн дүр ямар онцлогтой вэ. Дүрийнхээ тухай ярьж өгнө үү?
-“Бүсгүйн зурвас” жүжиг анх “Ярилцлага” гэдэг нэртэй байсан юм. Жүжиг сэтгүүлч бүсгүй төрийн түшээгээс ярилцлага авахаар очиж байгаагаар эхэлдэг. Үнэний эрэлд яваа сэтгүүлч бүсгүйн дүр бүтээхэд чамгүй хэцүү байсан.
-Энэ жүжгээр нийгэмд ямар мессеж өгөхийг зорьсон бэ?
-Хэвлэл мэдээллийн хэрэгсэл нь төр, ард түмний харилцааг холбож өгдөг онцлогтой. Тиймээс миний бүтээсэн дүрээс сэтгүүлч хүн гэдэг ямар байх ёстой вэ, сэтгүүлчийн ёс суртахуун гэж юуг эрэлхийлдэг вэ гэдгийг харж болно.
-Тайз, дэлгэцийн олон уран бүтээлд дүр бүтээх хүсэлтэй байгаагаа дээр дурдлаа. Энэ утгаараа цаашдын төлөвлөгөөгөө гаргасан байх?
-Дараагийн бүтээлийнхээ дүрийг одоохондоо задалмааргүй байна. Уран бүтээлч хүн дундрашгүй их хүсэл мөрөөдөл дунд байнгын хөглөгдөж байх ёстой. Би УДЭТ-т хоёр жил ажиллаж байна. Мэдээж олон сайхан дүрийг бүтээж, мөнхлөх чин хүсэл бий.
“Бүсгүйн зурвас” жүжгийн дууны үгийг Х.Соёмбо, аяыг Б.Чинбат зохиож, дууг Улсын Драмын эрдмийн театрын жүжигчин МУСТА Э.Тодгэрэл амиллуулжээ.
С.Нацагтовуу
Тасалбарыг www.ticket.mn, УДЭТеатрын билетийн кассаас болон 1900-1800 дугаарт залган үнэгүй хүргүүлэн авах боломжтой аж.
