Монгол Улсын хэмжээнд их, дээд сургуульд элсэгчдийн түвшинг тогтоох элсэлтийн ерөнхий шалгалтын хуваарь батлагджээ.

Тодруулбал, ирэх зургадугаар сарын 17-ны өдөр физик, монгол улсын түүх хичээл, 18-нд хими, англи хэл, газарзүй хичээлийн шалгалт явагдана. Харин мөн сарын 19-ны өдөр биологи, математик, 20-нд монгол хэл, нийгмийн тухай мэдлэг, орос хэл хичээлийн шалгалтыг тус тус зохион байгуулахаар товлосон байна.

Хамгийн гол нь шалгуулагч элсэлтийн ерөнхий шалгалтаас өмнө монгол хэл, бичгийн шалгалт өгч, тэнцсэн байх шаардлагатай. Тэнцээгүй тохиолдолд дахин өгөх юм. Монгол хэл, бичгийн шалгалт ирэх сарын 23-ны өдөр явагдана.  

Элсэлтийн ерөнхий шалгалтын математик, физик, химийн даалгаврын гүйцэтгэх хугацаа 100 минут, монгол хэл, англи хэл, орос хэл, биологи, газарзүй, Монгол улсын түүх, нийгмийн тухай мэдлэг хичээлийн шалгалтын даалгавар гүйцэтгэх хугацаа 80 минут байх юм байна.