Төв аймгийн Заамар сумын нутагт үйл ажиллагаа явуулдаг Эко Алтан Заамар ХХК-ийн уурхайд осол гарсан талаар бид өмнө нь мэдээлсэн билээ. Тус уурхайд хөрсний нуранги өчигдөр оройн 17:00 цагт үүсэн бөгөөд нурангид зургаан ажилтан өртсөний хоёрыг нь 80 метрийн гүнээс аварч тус сумын Хайлааст багийн эмнэлэгт хүргэн яаралтай тусламж үзүүлснээр биеийн байдал дээрдсэн байна.

Тэгвэл үлдсэн дөрвөн хүн болон цаг үеийн асуудлаар манай сэтгүүлч ОБЕГ-ын дэд дарга Б.Ууганбаяртай холбогдон тодруулга авсаныг хүргэе. 

Б.Ууганбаяр: Дахиад нуралт үүсэх магадлал тун өндөр байна

“Бидний зүгээс ослын газарт шаардлагатай ажиллагаа явуулж байна. Нурангинд өртөж нас барсан дөрвөн хүнийг гаргаж авах нь эхний зорилт болоод байна. Түүнээс энэ ослыг газар хөдлөлтийн нөхцөл байдалтай холбогдуулан авч үзэж болохгүй.

Хоёр машины операторууд кабиндаа байхдаа шороонд дарагдаж, талбайд ажиллаж байсан хоёр насосчин зугтаж байгаад нурангид өртсөн гэх мэдээлэлд үндэслэж, тодорхой байршлуудад эрлийн ажил үргэлжилж байна. Усны түвшин 6-7 метр гүн, хананаас ус шүүрч байна. Дахиад нуралт үүсэх магадлал тун өндөр байна” гэлээ.

Б.Жаргал