“Улсаа аврах ард түмний хөдөлгөөн”-өөс Эрдэнэтийн 51 хувийн талаар мэдээлэл хийлээ. Тэд “Оюутолгой” компанийн гүйцэтгэх захирал Армандо Торрес болон Монголын 34 хувийг төлөөлөн сууж буй төлөөлөгчдөд Оюутолгойн гэрээг цуцлах тухай албан шаардлага хүргүүлэхээ мэдэгдлээ.

Энэ талаар “Улсаа аврах ард түмний үндэсний хөдөлгөөн”-ий Удирдах зөвлөлийн дарга А.Эрдэнэбаяр “өнгөрсөн хоёрдугаар сарын 29-ний өдөр дэд ажлын хэсэг болон ажлын хэсгүүд хуралдсан. Үүгээр Оюутолгойн төслийн гэрээг хэрэгжүүлэх санал дүгнэлтийн асуудлыг хэлэлцэж, Байнгын хороо болон УИХ-ын чуулганаар оруулах санал хэлэлцсэн байна. Мөн Герман Улсаас төлөөлөгч авчран тодорхой санал дүгнэлт гаргуулах тухай яригдсан юм. Гэтэл энд 21 хуудас, 5000 дагавар гэрээ байна. Энэ гэрээнд Монгол Улсын эрх ашиг, Үндэсний аюулгүй байдлын зөвлөлд мэдэгдэхүйц гэрээ хийгдсэн талаар дурдагдлаа. Тухайлбал, Засгийн газрын өмчилдөг 34 хувь бүхий хөрөнгө, ирээдүйн мөнгөн урсгалд орж ирэх дансуудыг барьцааны агентад барьцаанд тавьсан асуудал яригдаж байна. Мөн барьцааны гэрээ, эрх шилжүүлэх гэрээ, зээлийн гэрээ, газар нутаг барьцаалсан гэрээний тухай зүйл заалтуудыг тодорхой тусгаж өгсөн байна. Түүнчлэн Оюутолгойн хөрөнгө оруулагч компаниуд нэн түрүүнд Монгол Улсын засгийн газраар зээлээ төлүүлэх, барьцаанд байгаа газруудыг хураан авах, уурхайг ашиглаж дуусаад ухсан нүхэнд нь цөмийн хог хаягдлыг булах эсвэл атомын цахилгаан станц барих тухай гэрээнд дурдагджээ. Эдгээр нь ноцтой гэмт хэргийн шинж агуулж байгаа тул уг гэрээг цуцлахыг Оюутолгой болон хөрөнгө оруулагч зургаан компаниас шаардаж байна” гэв.

Түүнчлэн УИХ-ын даргын захирамжаар байгуулагдсан гишүүдийг Оюутолгойн үйл ажиллагаатай танилцах үед баяжмал борлуулах гэрээ болон холбогдох зарим гэрээтэй таницуулахгүй байгаа нь Оюутолгойн хөрөнгө оруулагч компани Монголын төрийг далдуур удирдаж байгаагийн нэгэн илрэл юм. Харин УИХ эрх зүйн чадамжгүй, авлигал хээл хахуульд идэгдэж, Монгол Улсын эрх ашгийн төлөө ажиллаж чадахгүй нь тодорхой болсон тул тарах ёстой гэсэн байр сууринд тэд нэгджээ.

Б.Лхам