Монгол зэс корпорацийн ТУЗ-ийн дарга М.Мөнхбаатар Эрүүгийн цагдаагийн газар гэрчийн мэдүүлэг өгөхөөр ирэх үеэр түүнээс зарим асуудлыг тодрууллаа.

-Та ямар үндэслэлээр Эрүүгийн цагдаагийн газар дуудсан юм бэ?

-Бүрэн мэдээлэл байхгүй байна. Эрүүгийн цагдаагийн газраас дуудсан. Дуудсаных нь дагуу ирж байна. Өмнө нь Эрүүгийн цагдаа, АТГ-аас хэд хэдэн удаа дуудсан. Тухай бүрд нь ирж мэдээллээ өгч байсан. Өнөөдрийн болж байгаа үйл явцыг харахад өнгөрсөн долоо хоногоос өчигдрийг хүртэл үргэлжилсэн үйл явцтай холбоотой болов уу. Л.Оюун-Эрдэнэ сайд хүртэл цагдаагийн газар болон хуулийн байгууллагуудад үүрэг, чиглэл өгч байна лээ. ЗГХЭГ-ын даргын өгсөн үүргийн дагуу өнөөдрийн үйл явдал болж байна гэж бодож байна. Хуулийн байгууллага хөндлөнгийн хэн нэгнээс хараат бусаар ажиллах ёстой. Тэгж ажиллана гэж найдаж байна. Өнөөдөр бид Монгол Улсын хууль тогтоомжийг зөрчсөн зүйл байхгүй. Өчигдөр өгсөн тавилттай мэдээллийнхээ дагуу өнөөдрийн үйл явц болж байна гэж үзэж байна.

-ЗГХЭГ-ын дарга Л.Оюун-Эрдэнэ өчигдөр улсын мөнгөөр “Эрдэнэт”-ийн 49 хувийг авсан гэж мэдээлсэн. Гол нь 49 хувийг худалдаж авсан санхүүгийн эх үүсвэрээ тайлбарлахыг шаардаж байгаа юм биш үү?

-Ямар ч байсан ирж мэдүүлэг өг гэсэн. Тэр дагуу нь мэдээлэл өгөхөөр ирлээ. Манай компани улсаас ямар нэгэн байдлаар мөнгө аваагүй. Үүнийг албан ёсоор дахиж хэлье. Өнөөдрийн байдлаар Сангийн яам, Хөгжлийн банк, Монголбанкнаас манай компани асуулга тавиад 2019 оны нэгдүгээр сард зарим бичиг нь ирсэн. Үүгээр манай компани төрөөс нэг ч төгрөг аваагүй гэсэн төрийн байгууллагуудын албан бичиг бий. Бид тэр бичгүүдийг хэвлэлээр тараана. Өнөөдрийн өгч байгаа мэдээллийг системтэйгээр манай компанийн эсрэг мэдээлэл тарааж байна. ЗГХЭГ-ын дарга нь цагдаагийн байгууллагадаа үүрэг өгөөд хууль хүчний байгууллагыг санаатайгаар энэ үйл явц руу тохож байна.

-Танай компанийг санхүүжүүлсэн компаниуд нь төрөөс мөнгө авсан гэдэг схемийг танилцуулсан шүү дээ?

-Манай компани төрөөс ямар нэгэн байдлаар мөнгө аваагүй гэдгээ дээр дурдсан Сангийн яам, Хөгжлийн банк, Монголбанкны албан тоотууд бий. Тэр бичгийг өгье.

-Өмнө ямар асуудлаар дуудаж, байцааж байсан юм бэ?

-Л.Оюун-Эрдэнэ сайдын яриад байгаа төрөөс мөнгө авсан уу, үгүй юү гэдгийг л шалгаад байгаа. Үндсэндээ сүүлийн хоёр жил шалгагдаж байна. Бид материалаа нууж, зугтсан зүйл байхгүй. Өнөөдөр ч гэсэн би мэдүүлэг өгөх гэж ирлээ. Би өмнө нь дөрөв, таван удаа ирж мэдүүлэг өгсөн. Ц.Пүрэвтүвшин захирал надаас ч олон удаа ирсэн байх. Бид санхүүгийн бүх мэдээллээ төрийн байгууллагад гаргаж өгсөн. Ямар нэгэн байдлаар мэдээлэл нуугаагүй.

-400 сая ам.доллар хаанаас авсан бэ гэдгээ тайлбарлаж болохгүй юм уу?

-Энэ асуудлыг бид сүүлийн хоёр жилийн турш ярилаа. Манай компанийн авсан зээлийн гэрээ хүртэл хэвлэл мэдээллийн хэрэгслээр гарсан. Бид ямар ч мэдээлэл нуугаагүй. Энэ бол хувийн байгууллага системтэйгээр хувийн байгууллага руугаа дайрч байгаа л процесс.

-Ц.Пүрэвтүвшин захирлыг цагдан хорихоор явчих уу. Сулласан уу. Та холбогдсон уу?

-Би түүнийг мэдэхгүй байна. Энд мэдүүлэг өг гэснийх нь дагуу ирээд мэдүүлгээ өгөх гэж байна.

-Танай гэрт нэгжлэг хийсэн үү?

-Манай гэрт одоогоор нэгжлэг хийгээгүй байна.

-Та бүхнийг хэргээр Стандарт банканд ялагдсан гэсэн мэдээлэл бас бий. Шаардлагатай материалаа Арбитрт гаргаж өгөөгүй гэсэн мэдээлэл байна лээ?

-Өчигдөр ийм зүйл Цензүргүй яриа гэдэг нэвтрүүлгээр гарсан. Гэтэл та бүхэн санаж байвал 2016 оны тавдугаар сард Стандарт банкны Арбитрын шийдвэр гарсан. Хурал нь 2013 оноос эхлээд явсан. Манай компани 2016 оны зургадугаар сарын сүүлээр хувьцаа эзэмшигч болсон. Бидний ямар нэгэн оролцоогүйгээр Стандарт банкны шийдвэр гарсан. 2016 оны есдүгээр сарын 15-нд манай компанид бичгээр ирсэн. Түүнээс өмнөх процесс манай компанийн оролцоогүйгээр явсан.

-Л.Оюун-Эрдэнэ сайд өчигдөр “хэргээр унагасан байх магадлалтай байна” гэж ярьсан?

-Бид энэ үйлдвэрийн 49 хувийг бид эзэмшдэг. Бидний халааснаас хохирол гарна. Бид хохирол хүлээх зүйл дээр яагаад хэргээр ялагдах гэж. Тэр асуултыг хүмүүс яагаад асуухгүй байгаа юм бэ. “Эрдэнэт” үйлдвэрийн 51 хувь гээд байгаа боловч 100 хувиас л төлнө шүү дээ. Үүний 49 хувь нь манай компанийнх. Гэтэл тэр 49 хувь нь бидний халааснаас төлөгдөнө.

-Танай компани өнөөдрийг хүртэл ногдол ашиг аваад явж байна гэсэн үг үү?

-Нарийн мэдээллийг та бүхэнд жич өгье. Энэ жил ногдол ашиг аваагүй.

-АТГ-аас таныг дуудаж байсан уу?

-Тэгсэн. Миний ойлгож байгаагаар АТГ, Эрүүгийн цагдаагийн газрын хамтарсан ажлын хэсэг гэж байгуулагдаж, 1-2 жил болж байгаа юм шиг байна лээ. Сая ч гэсэн асуулт байна гэрчээр дуудахаар нь ирж байна. Дандаа гэрчээр дуудагдсан.

Р.Хишигжаргал