Улсын онцгой комиссын даргын тушаалаар орон нутагт ажиллаж буй шуурхай бүлэг өчигдөр Баян-Өлгий аймагт ажиллаж, хаваржилтын нөхцөл байдалтай танилцсан байна.
Тус аймгийн 13 сумын 90 багт 15 мянга 356 өрхийн нийт 2,141.533 толгой мал хаваржиж байна. Энэ сарын 1-ний өдрийн байдлаар бусад аймгийн нутагт 15 өрхийн 9.9 мянга, аймгийн нутаг дэвсгэрт 256 өрхийн 121.7 мянга, хилийн зурвас бүс нутагт 232 өрхийн 50.2 мянга, улсын тусгай хамгаалалттай бүс нутагт 181 өрхийн 685.5 мянга, нийт 684 өрхийн 250.4 мянган толгой мал отроор хаваржиж байгаа аж.
Тус аймгийн 12 суманд хаваржилт хүндэрчээ. Энэ өвөл цаг агаар олон жилийн дунджаас хүйтэн байснаас болж эхний хоёр сарын байдлаар 25 мянга 384 толгой мал зүй бусаар хорогдож, 26 мянга 241 толгой мал хээл хаяжээ.
Түүнчлэн Алтай, Алтанцөгц, Баяннуур, Буянт, Дэлүүн, Толбо сум бүхэлдээ, Бугат, Булган сумын зарим багууд, нийтдээ 60 гаруй багийн нутаг дэвсгэрт хаваржилт хүндэрч малын зүй бус хорогдол нэмэгдэх, мал төллөх явцад хүндрэл учрах нөхцөл байдалтай байгаа юм байна. Мал хорогдож буй шалтгаан нь бэлчээрийн ногооны гарц муугаас өнгөрсөн зун, намар мал тарга хүч сайн авч чадаагүй, өвөлдөө мөн тэжээлийн хомсдолд орсон гэж орон нутгийн удирдлагууд тайлбарлалаа.
Өвөл, хаврыг хүндрэл багатай даван туулахын тулд орон нутаг өөрсдийн хүчээ дайчлан дунд, дундаас доош тарга хүчтэй малыг нэмэгдэл болон байнгын тэжээлд оруулж, малчид өөрсдийн бэлтгэсэн өвс, тэжээлийг бүрэн зарцуулж, аймгийн Онцгой комиссын хурлын шийдвэрээр аймгийн аюулгүйн нөөцөөс өвөлжилт хүндэрсэн сумдад хөнгөлөлттэй үнээр өвс, тэжээл хуваарилжээ.
Аймгийн хэмжээнд болон зэргэлдээ аймгуудад намар хадсан хөх боодол өвс 8500-12000 төгрөг, мөс хөлдсөний дараа зундаа намаг, усан дундуур байсан шим сөл муутай боодол өвс 5800-7600 төгрөгийн үнэтэй байна. ОХУ, БНКУ-аас импортоор оруулж ирж буй нэг уут хорголжин багсармал тэжээл 26000 төгрөг, алслагдсан газруудад 35000 төгрөгт хүрч өсчээ.
Тиймээс улсын нөөцийн өвс тэжээлийг хаваржилт хүндэрсэн сумдын малчдад хөнгөлөлттэй үнээр олгох, импортоор авч байгаа хүчит багсармал тэжээлийн гаалийн татварыг чөлөөлүүлэх, ОХУ-аас өвс оруулах ажил зохион байгуулах, аймгийн Хүнс, хөдөө аж ахуйн газар, Нэгдсэн эмнэлэг, Цэнгэл, Улаанхус сум, Өлгий сумын Хотгор багийн Эрүүл мэндийн төвийн түргэн тусламжийн автомашины гүйлтийн хугацаа дууссан тул улсын нөөцөөс авто машин олгох зэрэг саналыг шуурхай бүлэгт уламжиллаа.
