2018 оны наймдугаар сарын 25-ны өдөр ажил үүргээ гүйцэтгэж явсан залуу галт тэргэнд шүргүүлж нас барсан харамсалтай хэрэг Дорноговь аймгийн Замын-Үүд суманд гарсан юм. Уг хэргийн талаар талийгаачийн ах Ш.Лувсансүрэнтэй цөөн хором ярилцлаа.
-Таны дүүд тохиолдсон явдалд харамсч байна. Чухам юу болсон юм бэ?
-2018 оны наймдугаар сарын 25-ны өдөр миний дүү ослын улмаас амь насаа алдсан. Тухайн өдөр найман эгнээ төмөр замын гармаас элсэнд дарагдсан цахилгааны утсыг холдуулах үүрэг өгсөн юм билээ. Энэ ажлыг хоёр хүн хийх ёстой байсан.
Дүү маань холбооны туслах механикчаар ажилд ороод удаагүй байсан юм. Осол гарснаас хойш энэ хэрэг шийдэгдэхгүй явсаар өнөөдрийг хүрлээ. Сүүлдээ дүүг маань согтуу байсан болгосон. Тухайн үед юу болсныг шалгахаар камерын бичлэг үзэх гэтэл “Камер ажилладаггүй” гээд харуулаагүй. Уг нь осол болсон газарт хоёр камер байдаг юм билээ.
-Тухайн үед дүүтэй тань хамт нэг хүн явсан гэл үү?
-Тийм. -Ослын талаарх бүдэгдэн мэдээлэл бий. Танд яг ямар мэдээлэл байгаа вэ?
-Осол тухайн өдрийн 10.05 цагт болсон. Дүү маань олон улсын галт тэргэнд шүргүүлж амь насаа алдсан. Гэтэл олон улсын тус галт тэрэг ирж байхад яагаад тэр хүүхдийг юм хийлгээд суулгаж байсан юм бэ. Сая Зам тээврийн хөгжлийн яамнаас нэг дүгнэлт гарсан.
-Ямар дүгнэлт гарсан юм бэ?
-Талийгаач согтуу байсны улмаас уг осол гарлаа гэсэн. Яамнаас зөвхөн төмөр замын талд шийдвэр гаргасан гэж үзэж байгаа. Ажилд гарахаас нь өмнө шалгаж гаргах ёстой биз дээ. Харин МХЕГ-аас үйлдвэрлэлийн осол гэж дүгнэсэн.
-Уг ажлыг хоёулаа хийдэг гэлээ. Хамт ажиллаж байсан хүн нь хаачсан байсан юм бэ?
-Хамт ажиллаж байсан хүн нь багажинд явсан хойгуур ийм хэрэг гарсан гэж хэлээд байгаа. Уг нь дадлагын хугацаанд явж байсан хүнд дагалдан хийлгэж, хариуцаж авсан хүн байдаг шүү дээ. Гэтэл дагалдан хийлгэж байсан хүн байгаагүй. Энэ дадлагын хугацаанд ажлын аюулгүй байдал зэрэг бүхий л зүйлийг заах ёстой шүү дээ.
-Хэрэг одоо ямар шатандаа явж байгаа юм бэ?
-Прокурорын шатанд яваа. Гэхдээ прокурорын зүгээс уг хэргийг хаах тухай ярьж байгаа гэсэн. Яг үнэндээ яахаа мэдэхгүй мухардаад байна.
-Таны дүү согтууруулах ундааны зүйл хэрэглэдэг байсан юм уу?
-Баяр ёслолын үеэр амсдаг л байсан байх. Гэхдээ дөнгөж дадлагынхаа хугацаанд явж байсан хүүхэд юу гэж ажил дээрээ согтуу байх вэ дээ, хэн ч бодсон. Гэтэл 0.5 бүхэлтэй согтууруулах ундааны зүйл хэрэглэсэн байсан гэх дүгнэлт гарсан. Эмч нарын хэлж байгаагаар хүний биед байдаг хэмжээ нь 0.4 бүхэл байдаг гэсэн. Гэтэл миний дүүгээс 0.5 бүхэл гарсан гээд байгаа юм.
-Дүү тань хэдэн настай байсан бэ?
-29 настай байсан. Сургуулиа төгсөөд л ажилд орсон юм.
-Төмөр замаас нөхөн олговор олгосон уу?
-36 сарын цалинтай тэнцэх хэмжээний нөхөн олговор олгосон.
Б.Лхам