Сүүлийн үед сошиолаар “Ховдын Ц.Пүрэвтүвшин гэж хэн бэ. Экс Ерөнхийлөгч Ц.Элбэгдоржийн ахынх нь хүүхэдтэй суусан хүн юм байна. Эрдэнэтийн 49 хувийн 15 хувийг нь Ц.Элбэгдорж эзэмшдэг гэж хэргээ хүлээсэн байна. Үлдсэн хувийг нь сахал Б.Эрдэнэбилэг тэргүүтэй дөрвөн хүн эзэмшдэг гэсэн гэнэ” гэсэн пост фэйсбүүк, твиттерээр хөврөх болов. Ийм постыг нөлөө бүхий улстөрчдөөс эхлээд судлаач, эрдэмтэд хүртэл шэйр хийсэн байх нь үнэн ч юм болов уу гэж эргэлзэхээр. Хэдийгээр цахим ертөнцөд тархсан мэдээлэлд итгэж, дүгнэлт хийх нь зохисгүй боловч “Худал үгийг 1000 давтвал үнэн болдог” гэдэг шиг дээрх пост газар авах тусам иргэд үнэмшиж эхэлж буй нь анзаарагдах болов.
Тэгвэл Ц.Пүрэвтүвшин гэдэг энэ хүн үнэхээр экс Ерөнхийлөгчтэй холбоотой юу гэсэн асуултад олны танил сэтгүүлч Б.Ганчимэг хариулт авсан байдаг. Б.Ганчимэг сэтгүүлч “Ховд гэхээр л Ерөнхийлөгч асан Ц.Элбэгдоржтой холбоотой болгодог жишиг бараг тогтчихлоо. Хаа хамаагүй байсан ч холбогддог. Бидний ярилцлагыг уншаад “Өө, энэ чинь Ц.Элбэгдоржийн л хүүхэд байна ш дээ” гэж хэлж ч мэднэ. Тийм болохоор “Та Ц.Элбэгдоржийг таних уу” гэж асуужээ. Уг асуултад
Ц.Пүрэвтүвшин: “Шууд утгаараа бол үгүй. Нөгөө утгаараа төрийн тэргүүн байсан хүнийг танихгүй хүн байхгүй биз. Бид бүгд мэднэ. Би энэ утгаар нь танина. Гэхдээ Ховдоос гарсан төрийн хүн гэвэл ганцхан Ц.Элбэгдорж Ерөнхийлөгч гэлтгүй Д.Дэмбэрэл гишүүн хүртэл байна. Эрдэнэт үйлдвэрийн ТУЗ-ийн гишүүн гэж байгаа юм, Д.Дэмбэрэл гуай байна. Өөр алдартай хүмүүс зөндөө л бий. Ц.Элбэгдорж Ерөнхийлөгчтэй бол би амьдралдаа ганц ч удаа уулзаж байгаагүй” гэж хариулжээ. Энэ бол 2018 оны наймдугаар сард өгсөн ярилцлага нь. Тэрбээр энэ ярилцлагаа өгөх үеэрээ албан ёсоор эхнэр аваагүй. Харин найз бүсгүйтэйгээ гурван жил хамт амьдарч байгаагаа ч хэлсэн байдаг. Тэгвэл хоёр үнэний аль нь үнэн бэ. Экс Ерөнхийлөгчийн хүргэн дүү юү, эсвэл түүнтэй амьдралдаа нэг ч удаа уулзаж байгаагүй, түүний хүргэн дүү биш гэдэг нь үнэн үү.
Аль нь ч үнэн бай, хамаагүй. Монголын толгой баян хэмээх нэрийг хүртэж, Эрдэнэт үйлдвэрийн 49 хувийг эзэмшигч “Монголиан корп Корпрейшн” компанийн гүйцэтгэх захирлын сэнтийд заларч, толгой дээгүүр сэвж явсан тэрбээр өчигдөр Засгийн өмнө толгой гудайв.
Учир нь хэдхэн хоногийн өмнө түүнийг АТГ-аас баривчилж, улмаар цагдан хорьсон боловч төд удалгүй сулласан. Түүний эсрэг ямар нотлох баримт бүрдүүлж, хавтаст хэрэгт хавсаргасныг тодорхой мэдэхгүй ч Төрийн ордоны үүдийг сахиж, “Тохиролцож, зөвшилцөлд хүрэе” гэж гуйж царай алдталаа сандаргасан бололтой. Хэрэг явдал хааш эргэхийг мэдэхгүй ч цаг төр эргэж, нэгэн хэсэг амаа хамхин, чихээ дарж суусан АН-ынхан эхнээсээ Эрдэнэтийн 49 хувийг хувьчилсан явдал нь хамгийн зөв шийдвэр байсан хэмээн ам уралдан өмөөрч эхлэв. Энэ мэтчилэн “Эрдэнэт”-ийг ээрсэн олон үнэний аль нь үнэн бэ гэдэгт олны толгой эргэчихээд байна. Нээрээ л энэ олон үнэний аль нь үнэн юм бол.
Р.Хишигжаргал
Сэтгэгдэл (13)