Төв аймгийн Заамар сум дахь "Баян" Базараагийн эзэмшлийн “Эко Алтан Заамар” компанийн ил уурхайд осол гарсны улмаас дөрвөн хүн нас барсан. Тэгвэл тус компанийн захирал амь алдсан ажилчдынхаа ар гэрийнхэнд Улаанбаатар хотод байрлал үл хамаарч хоёр өрөө байр авах эрх, дээр нь 36 сарын цалин төгрөг санал болгосон гэдэг мэдээлэл бий. Энэ талаар амиа алдсан иргэний ар гэрийнхэнээс тодруулахад “Бид “Эко Алтан Заамар” компанитай тохиролцоо хийхгүй. Тэдний буруугаас болж дөрвөн иргэн амиа алдсан байхад бид яагаад тохиролцох ёстой гэж. Дахиад ийм осол болж аавын хүү, ээжийн охин алтан амиа алдаж, эцэг, эх нь шар махтайгаа хатаж хоцорвол яах вэ. Тиймээс бид тохиролцохгүй. Үүнийх нь хариуцлагыг хүлээлгэх ёстой” гэсэн юм. Эндээс дүгнэвэл хоёр өрөө байр санал болгосон нь үнэн бололтой.
Өнөөдрийн ханшаар тооцвол хоёр өрөө байр гэдэг чамгүйлахааргүй их хөрөнгө. Гэхдээ хүнээс илүүтэй өв хөрөнгө бий юү. Энэ бол мэдээж элэг бүтэн амьдрал, аз жаргалтай инээлдэх бяцхан үрсийн баяр хөөр. Үүнийг хэдэн ч төгрөг, тэр байтугай хоёрхон өрөө байраар хэмжиж боломгүй мэт. Толгой хоргодох хоёр өрөө байртай байлаа гээд яах юм бэ. Өрөөг дүүргэх аав гэдэг хүн нь энэ хорвоог нэгэнт орхисон шүү дээ. Энэ хоосон орон зайг 36 сарын цалин орлоно гэж үү.
Хүний амийг байр, мөнгө төдийхнөөр үнэлж, хариуцлагаас мултрах гэсэн башир аргатнууд “Баян” Базараагаар тогтохгүй ээ.
Тодруулбал, 2018 оны наймдугаар сарын 25-ны өдөр ажил үүргээ гүйцэтгэж явсан залуу галт тэргэнд шүргүүлж амиа алдсан харамсалтай хэрэг Дорноговь аймгийн Замын-Үүд суманд гарсан. Талийгаачийн ах Ш.Лувсансүрэн “Тухайн өдөр найман эгнээ төмөр замын гарамаас элсэнд дарагдсан цахилгааны утсыг холдуулах үүрэг өгсөн юм билээ. Осол болсноос хойш энэ хэрэг шийдэгдэхгүй явсаар өнөөдрийг хүрлээ. Сүүлдээ дүүг маань согтуу байсан гэж гүтгэсэн. Осол болсон газарт хоёр камер байхаар нь шалгуулах гэтэл “Ажилладаггүй” гэсэн. Осол тухайн өдрийн 10.05 цагт болсон. Дүү маань олон улсын галт тэргэнд шүргүүлж амь насаа алдсан. Гэтэл галт тэрэг ирж байхад яагаад тэр хүүхдийг юм хийлгэж суулгасан юм бэ. УБТЗ-аас 36 сарын цалинтай тэнцэх хэмжээний нөхөн олговор олгосон” хэмээн ярьсан юм.
Энэ бол ердөө зургаахан сарын дотор таван залуу амиа алдсан осол. Үүний цаана олон нийтэд мэдэгдээгүй өнгөрсөн, бүр нууцалсан осол олон бий. Ар гэрээ тэжээхээр ажиллаж буй залуучууд энэ мэт алтан амиа алдах хооронд ээж, аав, эхнэр, хүүхэд амьдын тамд өдөр хоногийг өнгөрүүлж байна. Энэ тамыг хэдхэн сарын цалин, хоёр өрөө байр цайруулна гэж үү. Хамгийн гол нь амиа алдсан залуусын араас харуусал гэмшил тээхийн оронд “Бид их харамсаж байна. Гэхдээ энэ осолд манай компани буруугүй. Ажилчны хариуцлагагүй байдлаас болсон” гэж өөрсдийгөө хайцаалах нь хэр шударга явдал бэ. Нийгэмд шударга бусын хонгил гэж үнэхээр байдаг л юм бол амиа алдсан залууст л харин энэ зарчим үйлчилж байна.
Тэд энэ мэтчилэн хохирч үлдсэн ар гэрийнхнийг нь цөөн хэдэн халтар төгрөгөөр хуурч, хариуцлагаас мултрах гэсэн эздүүд олширлоо. Тэгвэл Монгол хүний ам нас, эрүүл мэнд хэдэн төгрөгийн үнэтэй бэ. Эцэг, эхээ алдсан бяцхан үрсийн сэтгэлийн шарх анихад хэдэн төгрөг зарцуулах бол.
Р.Хишигжаргал
Сэтгэгдэл (9)