2019 оны гуравдугаар сарын 21-ний өдөр 11.00 цагт Баянзүрх дүүргийн 13 дугаар хороо буюу “Офицер захын хажууд нэг жоохон хүүхэд машин доогуур хэвтэж байна” гэсэн дуудлагыг тухайн хорооны байрны манаач иргэн өгсөн байна. Дуудлагын дагуу Баянзүрх дүүрэг дэх цагдаагийн нэгдүгээр хэлтсийн жижүүрийн бүрэлдэхүүн шалгахад зургаан настай А гурван давхрын цонхоор унаж, осгож нас барсан байж болзошгүй байдалтай олдсон байна. Хүүг унаж, осолдсныг тухайн үед хүмүүс мэдээгүй бололтой.
Уг байранд талийгаачийн хүүгийн гэр байдаг бөгөөд хувийн цэцэрлэгт явдаг байж.
Талийгаач хүүгийн ээж, аав нь салсан. Хүүгийн аав Солонгос Улсад ажилладаг учир нь ээж, эмээ авга ах, эгч нартайгаа амьдардаг байжээ.
Хэрэг гардаг өглөө хүүг гэрт нь ганцааранг цоожлоод явцгаасан байна. Энэ хойгуур буюу өглөөний 07.00 цагт хүү тагтнаасаа унасан байна. Харин түүнийг байрны жижүүр 11.00 цагт олж дуудлага өгсөн байна. Хэрвээ хүүг тагтнаас унах үед олсон бол амьд үлдэх боломжтой байсан байж магадгүй гэх мэдээлэл байна. Учир нь хүү тагтнаас унах үедээ дотуур өмднөөс өөр хувцасгүй байсан нь осгох шалтгаан болсон байна.
Хэргийг цагдаагийн байгууллага үргэлжлүүлэн шалгаж байна.
Г.Эрдэнэ