Уур амьсгалын ногоон сангийн хөнгөлөлттэй зээлийн хөрөнгөөр хэрэгжүүлэх “Улаанбаатар хотын төлбөрийн чадварт нийцсэн ногоон орон сууц ба дасан зохицох чадвар бүхий хотын шинэчлэл төсөл”-ийн Зээлийн хэлэлцээрийн төслийг УИХ-ын Эдийн засгийн байнгын хорооны өчигдрийн хуралдаанаар зөвшилцөлд гишүүдийн олонх дэмжсэн юм. Уг төслийн хүрээнд 10 мянган өрхийн орон сууц барих бөгөөд гэр хорооллын 100 га талбайг холимог ашиглалт бүхий нийтийн эзэмшлийн зам, талбай болон байгууламжтай болгох аж.

Төслийг Уур амьсгалын ногоон сангийн 95 сая ам.долларын нэн хөнгөлөлттэй зээл, 50 сая ам.долларын буцалтгүй тусламжийн эх үүсвэрээр санхүүжүүлэх юм байна. Мөн Азийн хөгжлийн банкны 80 сая ам.долларын хөнгөлөлттэй зээл болон Дэвшилтэт технологийн сангийн 3 сая ам.долларын буцалтгүй тусламжийн эх үүсвэрээр тус тус санхүүжүүлнэ.

Уур амьсгалын ногоон сангийн зээлийн хүү 0.25, зээлийн хугацаа нь 40 жил, үүнээс эхний 10 жилд үндсэн төлбөрөөс чөлөөлөгдөнө. Тус зээлийн эх үүсвэр нь нэн хөнгөлөлттэй нөхцөлтэй буюу хамгийн таатай нөхцөлтэй зээл юм. Баянхошуу, Сэлбэ, Дамбадаржаа, Дэнжийн 1000 зэрэг байршлуудад өмнө нь байгуулсан дэд бүтцийг тулгуурлан орон сууцны барилга, байгууламжууд барих юм байна.

Тодруулбал, Баянхошуу дэд төвийн баруун талд 5.1 га газрыг эко хороолол болгон хөгжүүлэхээр төлөвлөжээ. Энэ хүрээнд 495 өрхийн орон сууцыг амины орон сууц (таун хаус) буюу нам давхрын барилга хэлбэрээр барьж байгуулах бол 4170 м2 нарны зай хураагуурын хавтантай, 4450 м2 цэцэрлэгт хүрээлэнтэй, 8500 м2 нийтийн ногоон байгууламж, тоглоомын талбайтай, 2130 м2 үйлчилгээний байгууллагуудын барилга, байгууламж байхаар төлөвлөжээ. Сэлбэ төвийн зүүн хэсгийн 6.4 га газрыг эко хороолол болгон хөгжүүлэх санхүүжилтийг мөн дээрх төслөөс шийдвэрлэх аж. Тус хороололд 584 өрхийн орон сууцыг амины орон сууц (таун хаус) буюу нам давхрын барилга хэлбэрээр барьж байгуулж, 4000 м2 нарны зай хураагуурын хавтан, 3500 м2 цэцэрлэгт хүрээлэнтэй, 13.500 м2 нийтийн ногоон байгууламж, тоглоомын талбайтай, 5800 м2 үйлчилгээний байгууллагууд, авто зогсоолын барилга, байгууламж байхаар төлөвлөжээ. Одоогоор зураг төсөл, төлөвлөгөө, тооцоолол зэрэг нь урьдчилсан байдлаар бэлэн болсон байна. Нэг метр квадрат талбайг 1-1.2 сая төгрөг байх тооцоолсон байна.

Төслийн санхүүжилтээр баригдах 10 мянган орон сууцны 15 хувь буюу 1500 орон сууцыг халамжийн зориулалтаар байгуулах бөгөөд оршин суугчид урсгал зардлаа төлж амьдрах бол 5500 өрх орлоготой нь дүйцүүлсэн өртгөөр харин 3000 орн сууцыг худалдахаар төлөвлөсөн байна.

Г.Нацаг