Монголын эмэгтэйчүүдийн холбооноос гэр бүлийн хүчирхийлэл, гэр бүл салалтаас болж хохирч буй хүүхдүүдийн талаар мэдээлэл хийлээ. Энэ үеэр Монголын эмэгтэйчүүдийн холбооны ерөнхийлөгч Б.Оюунгэрэл “2018 онд нийт 2945 гэр бүл гэр бүлэлтээ цуцлуулсан бөгөөд Гэр бүлийн тухайн хуулийн дагуу хянан шийдвэрлэсэн хэргийн 61.8 хувийг гэрлэлт цуцлах маргаан эзэлж байна гэдэг судалгааг ШЕЗ-өөс гаргасан. Түүнчлэн Монгол Улсад өрх толгойлсон 91503 иргэн байна. Үүнээс 72035 нь буюу 80 орчим хувь нь эмэгтэйчүүд гэсэн судалгааг Үндэсний Статистикийн хороо мэдээллэсэн. Өнөөдрийн нийгэмд үүссэн нөхцөл байдалд өрх толгойлсон эхчүүд, бага насны охидын бэлгийн хүчирхийлэл гэх мэт хурц асуудал олноор гарч байна.Эдгээр асуудлыг Гэр бүлийн тухай хууль зохицуулдаг боловч тус хууль нь 1999 онд батлагдсан. 2006 оноос хойш хуулийн шинэчилсэн найруулгын төсөл дээр зургаан удаа ажлын хэсэг байгуулагдаж, хоёр удаа УИХ-д өргөн баригдсан. Гэвч улс төрийн нөхцөл байдлаас болж дэмжигдээгүй. Тиймээс энэ удаагийн хаврын чуулганаар Гэр бүлийн тухай хуулийг улс төржүүлэлгүйгээр хэлэлцэж, батлахыг шаардаж байна” хэмээлээ.

Уг шаардлагад Шүүхийн шийдвэр гүйцэтгэлийн тухай хууль, Зөрчлийн тухай хуульд хүүхдийн тэтгэмж төлөх хариуцлагыг нэмэгдүүлж, нэмэлт өөрчлөлт оруулах тухай тусгасан байна. Учир нь одоо хүчин төгөлдөр хэрэгжиж байгаа хуулиар хүүхдийн тэтгэмжээ төлөлгүй зугтаасан иргэнд хүлээлгэх хуулийн хариуцлага байхгүй. Хэрэв гурван сараас дээш хугацаагаар хүүхдийн тэтгэлгээ төлөөгүй бол Зөрчлийн тухай хуулиар 100 мянган төгрөгөөр торгодог зохицуулалттай аж. Тэтгэмж төлөлтийн асуудал хүүхэд 18 нас хүрэхэд л дуусгавар болж хаагддаг учир бусад хуулиар зохицуулах эрх зүйн орчин байдаггүйг тусгажээ.

Түүнчлэн сүүлийн гурван жилд бага насны 292 охин, он гарснаар 4-17 насны 69 охин бэлгийн хүчирхийлэлд өртсөний дийлэнх нь ойр дотны хүмүүс, төрсөн болон хойд эцэг, ах, хамаатан, хажуу хөршийн хүмүүс нь үйлддэг аж. Ийм төрлийн гэмт хэрэг ихэвчлэн хуулийн шатанд хэрэгсэхгүй болох, ял завших явдал гардаг тул хууль шүүхийн холбогдох байгууллагуудад шударга ёс шаардаж, УИХ, Засгийн газар, холбогдох яам болон бусад байгууллагуудад шаардлага хүргүүлэхээ мэдэгдлээ.

Г.Эрдэнэ