Яг үнэндээ Ерөнхий сайд У.Хүрэлсүхийн танхимын хоёр ч сайд албан тушаалтайгаа үлдэх эсэх нь дээсэн дөрөөн дээр тулж, дэнчигнэж “эхэллээ”. Гүйцэтгэх засаглалынх нь тэргүүнд хуулиар олгосон бүрэн эрх, одоогийнх нь албан тушаалын дагуу. Нэг нь Барилга, хот байгуулалтынх, нөгөөх нь Хүнс, хөдөө аж ахуй, хөнгөр үйлдвэрийн сайд. Эхлээд тэр Барилга, хот байгуулалтын сайдад үүрэг өгсөн.
АСЕМ-аас өмнөх, хойно байх тухай юм. Утаанаас салсан мөртлөө өмхий үнэрт дарлуулсаар олон жилийг үдсэн нь нийслэлчүүдийн зовлон. Одоо элдэв “хольцгүй” агаар амьсгалах гэтэл Яармаг хавьцаа байрлалтай Төв цэвэрлэх байгууламжийн үнэр хот даяар “уушгилуулах” нь тэр.
Үүнээс урьдчилан сэргийлэхдээ манай хоёрдугаар хүн нэг асуудлыг хэлсэн, холбогдох сайдад нь үүрэг болгосон байдаг. БНСУ-д айлчлаад ирсэн тэрбээр БНХАУ-д очихдоо шинэ цэвэрлэх байгууламж барих санхүүжилтийн санамж бичигт гарын үсэг зурав. Түүнээс хойшхи ажил бараг урагшилсангүй. Гол хөрөнгө оруулалт нь Хятадаас учир тухайн тал дотооддоо сонгон шалгаруулалт зарлаж, гүйцэтгэгч компаниа манайд санал болгохыг хүлээв. Хамгийн сүүлд урд хөршийн Гадаад харилцааны сайд Ван И манайд айлчилсан. Тууз хүртэл хайчлаад айлчлал нь өндөрлөсөн.
“Шинэ Цэвэрлэх байгууламж барих асуудлыг Барилга, хот байгуулалтын сайд Х.Баделханыг “Хар толгой"-гоороо хариуцаарай” гэсэн шиг. “Шиг” гэдэг нь нэгэнт засгийн тэргүүнээс үүрэг авсан бол Х.Баделхан сайдын ажил. Энэ ажил бол Х.Баделхан сайдын ажлаа хэр хийснийг дүгнэх, хэр шаргуу байсныг нь дүгнэх гол шалгуур. Хэрэвзээ Барилга, хот байгуулалтын сайд энэ салбарыг тэргүүлэн ажиллах хугацаандаа нийслэлчүүдийг амьсгалах агаарыг “үнэр”-гүй болгосон уу гэдэг нь асуудал.
Замын түгжрэл, ипотекийн зээлд хамрагдах шат даваа, хамгийн гол нь эрүүл аюулгүй орчинд амьдрах Үндсэн хуулийн заалт "дотор муухай оргих" “ҮНЭР”-ээр үргэлжлэх ёстой гэж үү. “Нийтийн тээврээрээ үйлчлүүл” хэмээх гоё сайхан уриа лоозон бус амьсгалах агаарыг нь хүртэл өмхий үнэрээр “утаж” буйгаа шийдвэр гаргах хэмжээнд мэддэг болов уу?.
Ямар ч байсан "ҮНЭР"-тэйгээ дасан зохицсон нийслэлчүүдийн амьдрал ахуйд "ДЭМ" болох нэгэн үүргийг Ерөнхий сайд дахин өглөө. Тэрбээр "Ирэх жил мах, гурилын үнэ тэнгэрт хадвал Ч.Улаан сайд толгойгоороо хариуцна шүү. Дараагаар нь янз бүрийн учир шалтгаан тайлан тавиад байх шаардлагагүй" гэлээ. Үүнээс харахад амьсгалах агаар нь хүртэл "бохирдсон" нийслэлчүүд мах шөлөндөө санаа зовохгүй байж болох нь. Ядаж л Ерөнхий сайд үүрэг өгчихлөө. Хэдэн сарын дараа гэснээс тун удахгүй шинэ он гарлаа. Тэгээд ээлжит сонгуулийн цикл эхэллээ. Тэр үед буюу ирэх хавар цэвэрлэх байгууламжаас "үйлдвэрлэсэн" үнэр дахин нийслэлчүүдийн мэдрэмжийг шалгах уу, эсвэл 70 гаруй сая малтай монголчууд махаа тэнгэрт тулсан үнээр авах уу гэдэг нь цаг хугацааны асуудал болох нь. Тэр үед нийгэм, зах зээлийн зарчмаар бодлого тодорхойлсон хоёр сайд юу хэлэх нь сонин. Харж л байя!.
Г.Эрхэс
Сэтгэгдэл (14)