Яам, Тамгын газарт салбар хариуцсан сайд, Төрийн нарийн бичгийн даргаасаа давсан эрх мэдэлтэй, хүнд сурталтай нөхдүүд мэр сэр байх нь бий. Яг ийм “том толгой”-той нөхрийн харгайгаар Боловсрол, соёл, шинжлэх ухааны яамны нэр хүнд иргэдийн дунд унаж, цаашлаад төрийн үйлчилгээг хүртээмжтэй болгох ажил гацахад хүрчээ.
Тодруулбал, Боловсрол, соёл, шинжлэх ухаан, спортын яамнаас Боловсролын салбарын мэдээллийн системийн багт таван шинжээч ажилуулахаар болсон байна. Энэ дагуу тус яамны Төрийн нарийн бичгийн дарга Б.Баярсайхан 2019 оны дөрөвдүгээр сарын 18-ны өдөр тушаал гаргаж, бизнесийн туслах шинжээч, өгөгдлийн агуулахын шинжээч, java script хөгжүүлэгч, java script хөгжүүлэгчийн туслах хөгжүүлэгч зэрэг таван хүнтэй гэрээ байгуулахаар болжээ. Улмаар цалин хөлсний хэмжээг тогтоож, Боловсрол, соёл, шинжлэх ухаан, спортын яамны ажилтны үнэмлэх гаргаж өгсөн байх юм. Үүний дагуу тушаал нь гарч, залуус ажлаа эхлүүлж.
Гэтэл дээрх таван залуугийн цалинг тушаал батлагдсан өдрөөс эхлэн тогтмол өгөх ёстой байтал өнөөдрийг хүртэл нэг ч төгрөг өгөөгүй байна.
Энэ байдлыг шийдвэрлүүлэхээр болж тус яамны Төрийн захиргааны удирдлагын газрын даргын албан үүргийг түр орлон гүйцэтгэгч О.Хуягцогтод 2019 оны зургадугаар сарын 30-ны өдөр ханджээ. Гэвч өнөөдрийг хүртэл ямар ч хариу өгөөгүй аж.
Бүр хариу өгөхөөсөө төвөгшөөд “зугтдаг” болсон гэх. Энэ хугацаанд таван залуу ажил үүргээ хуваарийн дагуу гүйцэтгэж буй ч тэднийг ийнхүү чирэгдүүлэх болсон нь төрийн ажил зогсоход хүрчээ. Өөрөөр хэлбэл, дээрх таван залуугийн хувьд Монгол Улсын боловсролын салбарын системийг боловсронгуй болгохоор ажиллаж буй. Хэрвээ энэ ажил зогсох юм бол тухайн салбарын нэгэн хэсэг хуучирсан хэвээрээ үлдэх эрсдэлтэй юм.
Хурган дарга болох Төрийн захиргааны удирдлагын газрын даргын албан үүргийг түр орлон гүйцэтгэгч О.Хуягцогтын шийдийг хүлээж тэвчилгүй нэг залуу нь ажлаа орхин явсан аж. Ингэхдээ бүр нэг ч төгрөг гар дээрээ авч чадаагүй гэсэн.
Хэдийгээр тулга тойрсон жижиг асуудал мэт харагдах ч гэлээ төрд ажиллачихаад нэг ч төгрөгийн цалин авч чадахгүй хохирсоор байвал ард иргэд юугаараа бор ходоодоо тэжээх вэ.
Тиймээс БСШУС-ын сайд Ё.Баатарбилэг болон Төрийн нарийн бичгийн дарга Б.Баярсайхан нарт хандаж хэлэхэд мэдээлэл технологийн салбарт үнэлэгдсэн залуусын мэдлэг, боловсролыг салбараа шинэчлэхэд ашиглах гэж байгаа юм бол ядаж цалинг нь өгөөч ээ.
Тэд төрөөс төрсөн тэрбумтнууд биш шүү гэдгийг хэлчихье.
Г.Нацаг
Сэтгэгдэл (1)