Нийслэлийн хамгийн олон хүн амтай Сонгинохайрхан дүүргийн өмнө тулгамддаг асуудал олон. Хөдөө орон нутгаас шилжин ирэгсэд олонтайн хэрээр сургууль, цэцэрлэгийн хүрэлцээ тааруу, цаашлаад эмнэлгийн тусламж үйлчилгээ авахад хүртэл бэрхшээлтэй байв. Тэгвэл шинэ эмнэлэгтэй болох Сонгиночуудын мөрөөдөл биелэлээ оллоо. Тодруулбал, энэ сарын 28-ны өдөр тус дүүрэгт есөн давхар 250 ортой нэгдсэн эмнэлэг байгуулахаар шавь тавилаа. Тус эмнэлэг ашиглалтад орсноор дүүргийн Нэгдсэн эмнэлгийн ачаалал 50 хувь буурах боломжтой гэдгийг тус дүүргийн Эрүүл мэндийн төвийн дарга Ж.Болортуяа ёслолын арга хэмжээний үеэр онцолсон юм. Ёслолын арга хэмжээнд УИХ-ын гишүүн Ц.Гарамжав болон дүүргийн удирдлагууд оролцсон юм. Энэ үеэр “30 гаруй жилийн турш эмч мэргэжилтэн, ард түмний шинэ эмнэлэгтэй болох мөрөөдөл биеллээ оллоо” гэдгийг эмнэлгийн дарга онцолж, шинэ эмнэлэг барих төсвийг улсын төсөвт суулгуулж чадсан УИХ-ын гишүүн Ц.Гарамжавт талархсанаа илэрхийллээ.

УИХ-ын гишүүн Ц.Гарамжавын санаачилгаар баригдах нэгдсэн эмнэ­лэг ашиглалтад орсноор дүүргийнхээ өвчтөнүүдийг бусад дүүргийн эмнэлэгт шилжүүлэх, иргэдэд хүндрэл учруулах асуудал нэг талдаа гарах юм байна. Тодруулбал, дүүргийн эмнэлэгтмэс ажилбар хийх боломж хомс учир зарим мэс ажилбарыг хувийн эмнэлэгтэй гэрээ байгуулах замаар шийдвэрлэдэг аж. Тэгвэл шинэ эмнэлэг ашиглалтад орсноор 20 ортой мэс заслын тасаг нэмэгдэхээс гадна бөөрний аппаратны, хими эмчилгээний, хавдрын тасгууд нээгдэх юм. Түүнчлэн 200 ажлын байр бий болохоос эхлээд үр өгөөжөө өгөх юм байна.

Шинэ эмнэлэгтэй болох асуудлыг Сонгинохайрхан дүүргийн иргэд холбогдох байгууллага болон УИХ-ын үе үеийн гишүүдэд хүсэлт гаргаж байсан ч бодит ажил болж амжилгүй 20 гаруй жилийг ардаа үджээ. Олон жилийн турш хүлээлт үүсгэсэн энэ асуудлыг Сонгинохайрхан дүүргээс сонгогдсон УИХ-ын гишүүн Ц.Гарамжав гардан хөөцөлдөж, эмнэлэг барих төсвийг улсын төсөвт суулгуулсан байна. Энэ талаар Ц.Гарамжав “Эмнэлэг барих төсвийг анх 8.6 тэрбум төгрөгөөр баталсан юм. Шалгаруулалтын үйл ажиллагаа явагдаад төсөв нь тодорхой хэмжээгээр хасагдаж, найман тэрбум гаруй төгрөг төсөвлөгдсөн. Монгол Улсын хүн амын 10 хувь нь зөвхөн энэ дүүрэгт байна. Тэгэхээр нэг хүнд ногдох эрүүл мэндийн үйлчил­гээний хүртээмж хаанаа ч хүрэхгүй. Иргэд олон жил хүсэлт гаргаж ирсэн бөгөөд У.Хүрэлсүх сайдын Засгийн газрын үед төсвийг баталж, энэ асуудлыг шийдвэрлэ­лээ. Тендер шалгаруулалтын ажил саяхан дуусч, өнөөдрөөс барилгын шавыг тавьж, шанг нь татлаа. Ирэх жил гэхэд ашиглалтад оруулахаар төлөвлөөд байгаа” гэсэн юм.

Барилгын ажлыг “Хөх бүрдний эх” компани 2020 оны аравдугаар сард хүлээлгэж өгөхөөр ажлаа эхлүүллээ.