УИХ-ын гишүүн Д.Оюунхорол нарын өргөн барьсан “Бурхан багшийн Их дүйчин өдрийг нийтээр тэмдэглэх баярын өдөр болгох тухай”, “Бага хүүтэй, барьцаагүй, 20 сая төгрөг хүртэлх хэмжээтэй "Итгэлийн зээл олгох” зэрэг санаачилсан хуулийн төсөл иргэдийн дунд ихээхэн маргаан дагуулаад буй. Тэгвэл уг асуудлаарх гишүүдийн байр суурийг хүргэе.

Ж.Бат-Эрдэнэ: “Итгэлийн зээл”-ийг дэмжиж байгаа. Бид зах зээлийн нийгэмд шилжээд 30 орчим жил болчихлоо. Бүх зүйлийг зах зээлийн журмаар шийднэ гэж байгаа. Гэхдээ зах зээл маш хатуу системтэй учраас төрийн зохицуулалт, дэмжлэг зайлшгүй байх ёстой. Тиймээс “Итгэлийн зээл” дэмжинэ. Бүтээн байгуулалт, улс орны хөгжил гээд том зүйлийг ярьж байна. Зах зээлд орсноосоо хойш ард иргэдийнхээ амьжиргаа, аж ахуйн нэгжүүдийн дэмжлэг туслалцаагүйгээр цааш явахгүй. Бүтээн байгуулалтыг аж ахуйн нэгж хийнэ. Ажлын байр, зах зээлийг хэн бий бий болгох юм аж ахуйн нэгжүүд л хийнэ. Иймд зах зээлийн нийгэмд тодорхой хэмжээний дэмжлэг, туслалцаа, зохицуулалтгүйгээр цааш явахгүй. Иргэдэд зүгээр зээл өгөхдөө биш тодорхой нөхцөлтэйгөөр олгоно. Түүнээс эсгий таавчик хийх нь тийм чухал биш гэж үзэж байгаа.

Д.Хаянхярваа: Өнөөдөр магадгүй Бурхан багшийн дүйчин өдөр, дараа нь Исүс Христ, Аллах гээд яваад өгөх юм бол инээдэмтэй юм болно гэж ойлгож байна. Тиймээс хэрэггүй хуулийн төсөл гэж харж байна.

Харин “Итгэлийг зээл” гэдэг нь манай намын хөтөлбөрт бий. Хүүгүй зээл. Бид аливаа зүйлийг тодорхой эдийн засгийн хөшүүрэггүй хэрэглэвэл буруу зам руу ордгийн жишээг жижиг, дунд үйлдвэрлэлийн зээлийн сангаас авсан төслүүд харуулсан. Тиймээс алдаа гаргадаг боломжуудыг дахин нээж өгөөд байх шаардлага байна уу гэж харж байна. Ямар ч тохиолдолд хүүгүй, бэлэн юм өгдөг ойлголт байж болохгүй. “Итгэлийн зээл”-д олгох мөнгөний санхүүжилтийг татвар төлөгчдийн халааснаас гаргана. Тиймээс тодорхой төвшинд эдийн засгийн хөшүүрэгтэй байх ёстой. Эдийн засгийн дахин нэг бүлэг хэрэг гарч ирэхийг хэн ч үгүйсгэхгүй. Үүний оронд банк санхүүгийн систем, эдийн засгийн дэмжлэг үзүүлдэг байгууллагын хууль эрх зүйн орчныг хэрхэн сайжруулах, өгч, авч байгаа зарчмыг хуульд хэрхэн нийцүүлж хүртээх асуудлыг ярих ёстой.

Б.Дэлгэрсайхан: Бурхан багшийн Их дүйчин өдрийг амралтын өдөр болгоно гэдэг буруу л юм байгаа юм. Тухайн өдөр сүсэглэж, мөргөх хүмүүс нь очно биз. Заавал амралтын өдөр болгох гээд байгааг ойлгохгүй байна.

“Итгэлийн зээл”-ийн хувьд нэгдүгээрт, үнийн дүн бага. Хоёрдугаарт, эргэж төлөгдөх үү гэдэг нь асуудалтай. Эргэн төлөгдөхгүй байна гэдэг нь эдийн засагт асар хортой шүү дээ.

Б.Лхам