Эрүүл мэндийн яамнаас COVID-19 халдварын нөхцөл байдлын талаар мэдээлэл хийлээ. 

ЭМЯ-ны Гадаад харилцааны хэлтсийн дарга Б.Янжмаа “АНУ-д халдварын тохиолдол огцом өсөж, халдварын тоогоор БНХАУ, Италийг давлаа. Нью-Йорк хотын эмнэлгийн удирдлагуудын хэлж байгаагаар халдвартай иргэн 11-21 хоног амьсгалын аппарат хэрэглэж байна гэсэн мэдээлэл өглөө. Сүүлийн өдрүүдэд Мадрид улсад эмнэлгүүдийн цогцос хадгалах газар ачааллаа дийлэхээ байсан учраас спорт, урлагийн газрыг ашиглаж эхэлжээ. Мөн Япон улс өнөөдрөөс эхлэн Европын 21 улсаас ирэх зорчигчдын хөдөлгөөнийг хязгаарлаж эхэллээ" гэв.

ХӨСҮТ-ийн захирал Д.Нямхүү “Токио-Улаанбаатар чиглэлийн нислэгээр ирсэн 96 зорчигчийн шинжилгээнд халдвар илрээгүй. Тандалтын зорилгоор авсан 28 хүний шинилжгээгээр сөрөг гарсан. Ингээд үүргийн онгоцоор ирсэн иргэдийг ээлж дараатай шинжилгээнд хамруулж байна. ХӨСҮТ-д өнөөдрийн байдлаар 208 хүн байна. Өчигдөр ХӨСҮТ-д хоёр, Сэлэнгэ аймагт хоёр, Дархан-Уул аймагт хоёр иргэнийг тусгаарлаж тандалт судалгаа хийж байна. Өвчтөнүүдийн биеийн байдал тогтуун байна. Энэ бол сайн мэдээ юм” гэлээ.

А.Сүх