Монгол Улсын Ерөнхий сайд асан М.Энхсайханд Тавантолгойн асуудлаар эрүүгийн хэрэг үүсгэж, хэргийг шүүхэд шилжүүлээд буй. Уг асуудлаар М.Энхсайхан болон н.Ренцэнтавхай, эрх зүйч Баярсайхан нар өнөөдөр мэдээлэл хийлээ.

М.Энхсайханы хувьд Тавантолгойн хэргийн талаарх мэдээллийг олон нийтэд ил тод мэдээллэх хүсэлтийг холбогдох албаныханд гаргаад байгаа юм. Энэ талаар М.Энхсайхан "УИХ-ын дарга Г.Занданшатах, УЕП Б.Жаргалсайхан нарт би ил захидал бичсэн. Гол нь Монголд хэлмэгдүүлгийн машин ажиллах вий. Улс орны хөгжил буруу тийш явах вий гэхээс санаа зовж байна. Тиймээс болсон процессийг ил тод мэдээллэхийг хүсэж байгаа юм. Алдаа байвал засая, дутагдал байвал залруулъя. Ил захидалд ч энэ талаар бичсэн. 

Тавантолгойн гэрээний хувьд ажлын хэсгийг би ахалж, гэрээний төслийг Загсийн газраар хэлэлцэж, УИХ-д өргөн барьсан нь гэмт хэрэгт тооцогдсон. Өөрөөр хэлбэл, УИХ, Засгийн газрын шийдвэрийн дагуу ажилласан хүмүүс ялтан болж байна. Энэ бол ноцтой үйл явдал. Үүнд дүн шинжилгээ хийж байр сууриа илэрхийлээч гэдэг хүсэлт гаргасан. Мөн хорлон сүйтгэх гэдгээр зүйлчилсэн. Гэтэл би 2013, 2014, 2015 онуудад ээдрээ дагуулсан олон төслийн асуудлыг шийдэх гэж суусан. Үүний нэг нь Тавантолгой-Гашуунсухайт чиглэлийн 260 км төмөр замыг хэрхэн барих вэ, өмнө нь ямар алдаа гаргасан байна, яаж үүнийг шийдэх үү гэдэг зүйлийг асуудал болгон дэвшүүлж ярьсан. Гэтэл намайг хөөж, туусан. 

Дараа нь цахилгаан станцын төсөлд ажилд орсон. Өнөөдөр бидний бэлтгэсэн төслөөр Эрчим хүчний сайд нь хөрөнгө оруулалт татсан талаараа мэдээлсэн. Ингэхээр нэг ч гэсэн дэвшил байгаа юм байна гэж бодож байна. Гэхдээ Тавантолгойн гэрээ бүтээгүй. Үүний шалтгаан нь улстөржилтөөс болсон. Үнэн хэрэгтээ Монголд маш үр ашигтай төсөл байсан. Гэтэл хорлон сүйтгэх ажиллагаа гэсэн. Тиймээс бусад төсөлтэй хамт давхар шалгаж, олон нийтэд мэдээлэл өгөөч гэдэг хүсэлтийг УЕП-т хүргүүлсэн. Учир нь хэрвээ намайг хорлон сүйтгэгч гэж үзэж байгаа юм бол энэ хорлон сүйтгэх ажиллагаа миний ажилласан бусад төсөл хөтөлбөрт ч гэсэн байгаа гэж үзэх ёстой. Энэ асуудлыг тавьсан шалтгаан нь монголчууд дараа дараагийн том төслийг эхлүүлнэ, хэрэгжүүлнэ. Гэтэл эдгээрт ажилласан залуусын зоригийг нь мохоож өөрсдөдөө ашиглах вий гэдэг үүднээс ийм алхам хийсэн" гэсэн юм.

н.Ренцэнтавхай "Харваас илт зүйлийг мушгин гуйвуулсан зүйл болж байна. Энэ үеэр бид энэ хүнийг АН-ын даргаар сонгож байсан. Гэтэл хорлон сүйтгэгч гэдэг нэр зүүх нь шударга ёсонд үл нийцнэ. Дээр нь ардчидсан хөдөлгөөний анхдагчид бид ийм бусармаг зүйлийг хүлээн зөвшөөрөхгүй. 

Ардчиллын төлөө зүтгэсэн хүн бүрийг харлуулдаг явдал цахим орчинд гаарлаа.

Тавантолгойн төсөл бол мега төсөл. Кевийн сургууль төгссөнөөс хойш шат дараалсан олон алба эрхэлсний дараа энэ төслийг хариуцуулсан. Түүнээс биш хэн нэгэн нам дагаж, цүнх барьсан залуу хүн энэ төслийг хариуцаагүй. Энэ талаар хэлэлцүүлэг хийе гэж уриалсан. Ойлгодог хүн алга" гэлээ.