Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийн шинэчилэн найруулгын төслийг УИХ-ын нэр бүхий есөн гишүүн санаачилж УИХ-ын дарга Г.Занданшатарт өргөн барьлаа.

Энэ талаар МАН-ын бүлгийн дарга, УИХ-ын гишүүн Д.Тогтохсүрэн "Хуулийн төсөл зургаан бүлэг, 80 зүйлтэй. Хуулийн төсөл боловсруулсан шалтгаан нь Үндсэн хуулийн нэмэлт, өөрчлөлттэй холбоотой юм. Хуулийн төслийн онцлог нь засаг захиргаа, нутаг дэвсгэрийн нэгж тус бүрийн чиг үүрэг бүрийг тусгайлан зааж өгсөн.

Мөн хамгийн ойр байгаа нэгжид эрх мэдлийг олгохоор тусгасан. Өмнөх хуульд аймаг, сумдын болон нийслэл, дүүргийн Засаг даргын чиг үүрэг давхцсан байсан. Хуулийн төслийн шинэчилсэн найруулгаар энэ чиг үүргийн давхцал үгүй болно. Түүнчлэн ИТХ-д томоохон өөрчлөлт оруулсан. Орон нутагт улс төрийн намаас нэр дэвшүүлэхгүй байхаар тусгасан. Орон нутагт улстөржилт байхгүй болно гэсэн үг. Үүнээс гадна ИТХ хариуцлагагүй ажиллавал тараах, төлөөлөгчийг эгүүлэн татах, намын бүлэг байгуулахыг хориглох зэргээр улс төрийн намын нөлөөлөөс ангид байлгах, хариуцлагатай байх заалт оруулсан. 

Засаг дарга бол төрийн төлөөлөгч. Тиймээс сонгохдоо аль болох хялбарчлах, Ерөнхий сайдаас хамааралтай байхаар чиглэгдсэн. Мөн орон нутгийн санхүү, өмч, татвар, эдийн засгийн эрх мэдлийг нэмэгдүүллээ. 

Үндсэн хуультай холбоотой хот, тосгоны засаг захиргааны ямар эрх мэдлийг шилжүүлэх бэ гэдгийг тусгасан" гэлээ.

Хууль санаачлагчдын зүгээс хуулийн төсөлд бэлтгэл ажил ихээхэн шаардлагатай учир 2021 оноос хэрэгжүүлэхээр тусгасан аж. 

Түүнчлэн МАН-ын сонгуулийн санхүүжилт Сонгуулийн тухай хуулиараа явна. УИХ-ын сонгуульд өрсөлдөх гишүүдээс 50 сая төгрөг авч судалгаа хийсэн зүйл цахимд тархсан. Тийм зүйл байхгүй. Нэр дэвшигчид өөрсдөө судалгаа хийж байгаа. Түүнээс биш албан ёсоор мөнгө хураагаагүй. Намын удирдлагуудаас УИХ-ын гишүүд сонгуульд нэр дэвшихдээ хуулийн хүрээнд сонгуулийн санхүүг бүрдүүлэх ёстой гэсэн байр суурь илэрхийлсэн" гэлээ.