НҮБ-ын Хүүхдийн Сангаас Хөдөлмөр, нийгмийн хамгааллын яам, Завхан аймгийн ЗДТГ-тай хамтран уур амьсгалын өөрчлөлттэй холбоотой цаг уурын хүндрэл, цочролын үед хүүхдэд чиглэсэн нийгмийн хамгааллын арга хэмжээг энэ өвөл туршилт байдлаар Завхан аймагт хэрэгжүүлж эхэлсэн билээ. Туршилтын эхний шатанд Завхан аймгийн өвөлжилт хүндрэх магадлалтай Тэс, Баянтэс, Тосонцэнгэл, Их-уул сумын 0-5 насны 2730 хүүхдэд тус бүр 40 000 төгрөгийн бэлэн мөнгөний тусламжийг Засгийн газрын хэрэгжүүлдэг хүүхдийн мөнгөний тогтолцоог ашиглан хүргэсэн. Мөнгөн тусламж авсан айл өрх хүүхдүүддээ дулаан хувцас, гутал, шаардлагатай ханиадны эм, амин дэм авч өгчээ.
Нийт 490 000 ам.долларын санхүүжилттэй цочролд хариу үзүүлэх нийгмийн хамгааллын арга хэмжээний тус туршилтын 2 дахь үе шат сая Завхан аймгийн Улиастай сумаас бусад хөдөөгийн 23 суманд хэрэгжиж, 0-5 насны 6747 хүүхдэд 20 000 төгрөгийн тусламжийг 2 ба 3 дугаар сард хүүхдийн мөнгөний тогтолцоог ашиглан хүргэлээ. Өвөлжилт хүндэрсэн, дээрээс нь COVID-19 цар тахал нүүрлэсэн энэ хүнд үед хүүхдийн мөнгөн тусламж айл өрхөд ихээхэн дэм болж байгааг иргэд ярьж байна. “Үүнээс өөр орлого одоогоор бидэнд алга, барааны үнэ бас тодорхой хэмжээгээр өссөн, хүүхдийн сургууль, цэцэрлэгийг хаасан байгаа тул бид хүүхдийн энэ мөнгөн тусламжаар амьдралаа болгож байна” гэж малчид НҮБ-ын Хүүхдийн Сангийн ажилтнуудад ярьжээ.
Хэдийгээр зудын улмаас ихэнх малчид төл бага хүлээн авч байгаа, ноос, ноолуурын үнэ доогуур, орлогогүй байгаа ч хүүхдээ хоолтой, дулаан хувцастай байлгахад санаа зовохгүй байгаагаа ярилаа.
“Нэг тэрбум тэрбум гаруй төгрөгийн санхүүжилт бүхий цочролд хариу үзүүлэх нийгмийн хамгааллын арга хэмжээний энэхүү туршилтыг бид ирэх өвөл дахин хэрэгжүүлж, үр нөлөөг нь судалсны дараа Монгол Улсын Засгийн газраас нийгмийн хамгааллын тогтолцоондоо шингээн, санхүүжүүлэн хэрэгжүүлдэг болно гэж итгэж байна. Ингэснээр манай нийгмийн хамгааллын тогтолцоо уур амьсгалын өөрчлөлттэй холбоотой болон аливаа цочролын үед хүүхдүүдээ илүү сайн хамгаалах чадвартай болж, улмаар хүүхдийн хөгжил, эрүүл мэндэд урт хугацаанд сөрөг нөлөө бүхий эрсдэлээс гэр бүл, хүүхдийг сэргийлэх болно” гэж НҮБ-ын Хүүхдийн Сангийн Орон нутгийн хөгжлийн мэргэжилтэн Б.Зоя хэлэв.
Их Уул сумын Засаг даргын орлогч С.Бавуусүрэн хэлэхдээ “Сумын төсвийн бүх байгууллагын нэг сарын нийт төсөв 36-40 сая төгрөг байдаг. Тэгвэл энэ хүүхдийн мөнгөн тусламж нь тухайн суманд сард 17 сая төгрөгийг 0-5 настай хүүхдэд олгож байгаа нь сумын мөнгөн эргэлтийг бараг 50 хувиар тэлж, орон нутгийн эдийн засагт мөн давхар эерэг нөлөө үзүүлж байна. Мөн малчдын өмнө тулгардаг аливаа цочролыг хүүхдэд хохирол багатай даван туулахад энэ арга хэмжээ чухал үр нөлөөтэй байна” гэв.
“Зудын үед бид мал, малчдад түрүүлж тусламж үзүүлдэг, хүүхдүүдээ орхигдуулдаг байсан. Харин энэ хөтөлбөрийг хэрэгжүүлснээр бид байгалийн гамшгийн үед хүүхдүүддээ илүү сайн дэмжлэг үзүүлэх тогтолцоотой болох боломжтой байна. Өнөөдөр манай аймагт хэрэгжүүлж байгаа энэ санаачилга маргааш улс орон даяар хэрэгжих хөтөлбөр юм. Үүнд Завхан аймаг өөрсдийн туршлагаа хуваалцан манлайлан ажиллахад бэлэн байна” гэж Завхан аймгийн Засаг дарга Д.Батсайхан ярилаа.
Дээрх хөтөлбөрийн санхүүжилтийг НҮБ-ын Тогтвортой хөгжлийн сангаас гаргаж байгаа юм.
