УИХ-ын гишүүн Д.Лэндээжанцан УИХ-ын Дэгийн тухай хуулийн шинэчилсэн найруулгын талаар мэдээлэл хийлээ.
Тэрбээр "УИХ-ын чуулганаар 2019 оны арваннэгдүгээр сарын 14-нд Үндсэн хуулийн нэмэлт, өөрчлөлтийг баталсан. Үүнтэй холбогдуулан шинэчлэн, найруулж батлах хуулийн жагсаалт гаргасан. Энэ хуваарийн дагуу УИХ-ын чуулганы Дэгийн тухай хуулийг өнгөрсөн баасан гарагт өргөн барилаа. УИХ төрийн эрх барих дээд байгууллага. Хууль тогтоох ажилд хянан шалгах үйл ажиллагаа явуулдаг. Хууль тогтоох, хянан шалгах үйл ажиллагааны ажил ямар зохион байгуулалттай байхаас түүний хүртээмж, үр ашиг, шударга байдал шалтгаална. Аливаа ажлыг хийхэд хөдөлмөр зохион байгуулалт ямар байхаас үр дүн гардаг гардаг учраас эхлээд Дэгийн тухай хуулийг шинэчлэхээс өөр аргагүй.
УИХ-ын Дэгийн тухай хуульд нийт 26 удаагийн нэмэлт, өөрчлөлт орсон байна. Одоогийн Дэгийн тухай хуульд нөхөөстэй дугуй шиг болсон учраас Үндсэн хуулийн өөрчлөлттэй нийцүүлэн, олон улсын үр дүнд хүрээд байгаа орнуудын жишиг, өөрсдийн туршлагатаа тулгуурлан хуулийн төсөл боловсруулж өргөн барьсан.
УИХ-ын хууль тогтоох, хянан тогтоох ажиллагаа маш өргөн дэлгэр байдаг. Бүх зүйл дэгээр зохицуулагддаг учраас асуудлуудыг нэгд нэгэнгүй зохицуулах асуудал үүссэн. Ингээд бидний өргөн барьсан хуулийн төсөл 14 бүлэг, 126 зүйлтэй. Анхдугаар чуулганыг зохион байгуулах талаар нэлээд өөрчлөлт хийлээ. Өөрөөр хэлбэл, Их Хурал өөрөө өөрийгөө зохион байгуулна гэдэг санаагаар хийсэн. Насаар хамгийн ахмад гишүүн хурлыг удирдаж, дараа нь Их Хурлын даргыг сонгоно. Тангараг өргөх журмыг УИХ-ын дарга батална. Засгийн газрын гишүүдийг нэг бүрчлэн танилцуулна. Томилогдсоноос хойш гурав хоногийн дотор Их Хуралд тангараг өргөх зэрэг өөрчлөлтүүд тусгагдсан” гэлээ.
Б.Лхам
