Монгол Улсын Ерөнхий сайд У.Хүрэлсүхэд Монголын сэтгүүлчдийн нэгдсэн эвлэлээс 200 гаруй сэтгүүлчийн гарын үсэг бүхий шаардлага хүргүүллээ. Уг шаардлагад "Ган үзэгтэн" ХХК-ийн Зариг.мн сайтын бэлтгэсэн “ТЕГ-ын дарга, генерал Д.Гэрэлийн хүү Г.Аранзалын эзэмшлийн алтны уурхай байгаль орчин, иргэдийн эрүүл мэндэд ноцтой хохирол учруулж байгаа” баримтат нэвтрүүлгийн мөрөөр хяналт шалгалт хийх, мөн хуулийн байгууллагын албан тушаалтан сэтгүүлчийн биед халдсан асуудлыг тусгасан байна. 

Уг шаардлагыг хүргүүлэх үеэр Засгийн газрын хэвлэл мэдээлэл, олон нийттэй харилцах албаны дарга Ц.Ганзориг "Засгийн газрын зүгээс иргэдийн мэдэх эрхийг дээдэлж ажилладаг. Бидний зүгээс шүүн таслах ажиллагаанд хөндлөнгөөс нөлөөлөх эрхгүй. Гэсэн ч уг асуудлыг анхааралдаа авах болно" гэдгийг хэллээ. Харин Зариг.мн сайтын сэтгүүлч Н.Өнөрцэцэг "Сэтгүүлчидтэй яаж л бол яаж харьцаж болно гэдэг ойлголт нийгэмд бугшсан. Сэтгүүлчдийг ажлаа хийж байхад олон янзаар саад учруулсан тохиолдол гарч байсан. Бид ч тэрийг нь байх ёстой мэтээр хүлээж аваад сурсан байна. Одоо үүнийг халах цаг болсон. Би иргэдийн мэдэх эрхийг хангаж ажилласан. Гэтэл бусдыг гүтгэсэн хэрэгт буруутгагдаж байна" гэлээ.

МСНЭ-ийн ерөнхийлөгч Х.Мандахбаяр энэ талаар "Сэтгүүлчдийн хэвлэн нийтлэх мэдээлэх эрхийг хуулиар хааж боох нь шударга ёсыг хавчсан зүйл. Тиймээс мэргэжлийн холбооны зүгээс сэтгүүлчдийн гарын үсгийг цуглуулсан. Нийт 200 гаруй сэтгүүлч нэгдсэн. Гарын үсэг цуглуулах ажиллагаа цаашид үргэлжилнэ" гэв.