АТГ-аас энэ оны нэгдүгээр улиралд хийж хэрэгжүүлсэн ажлын талаар мэдээлэл хийлээ.

АТГ-ын Хэвлэл, олон нийттэй харилцах асуудал хариуцсан ахлах ажилтан, ахлах комиссар Т.Баярхүү “Цар тахлын дэгдэлтийн үеэр иргэн, аж ахуйн нэгж байгууллагаас УОК болон эрүүл мэнд, онцгой байдлын асуудал эрхэлсэн төрийн захиргааны байгууллагуудад хандив тусламж өгч байгаа. Хандив, тусламжийн хөрөнгийг захиран зарцуулах, тайлагналын үйл ажиллагааг ил тод байлгах чиглэлээр зөвлөмжийг АТГ-аас хүргүүлсэн. БСШУСЯ-аас боловсруулж УИХ-д өргөн барьж нэвтрүүлсэн суралцагчийн сургалтын талбар, амьжиргааны зардалд зориулан нөхцөлтэй зээлийг улсын төсвийн оролцоотой эх үүсвэр бүрдүүлэх, эргэн төлүүлэх, сургалтын төлбөрийн зээлийг хөнгөлөх, чөлөөлөх, хүчингүй болгох журмын төслийг хянан хэлэлцэх журамтай холбоотой үйл ажиллагаанд авлигаас урьдчилан сэргийлэх зөвлөмжийг тусгах чиглэлээр тодорхой зүйл заалт бүхий зөвлөмжийг хүргүүлээ.

Гэмт хэргийн шалтгаан нөхцөлийг арилгах чиглэлээр мөрдөгчийн мэдэгдлийн мөрөөр Зам тээврийн хөгжлийн яам, АТҮТ, Хил хамгааах ерөнхий газар, Төв аймгийн Сэргэлэн, Эрдэнэ сум, Нийслэлийн Хан-Уул, Багануур, Налайх үүрэг, Нийслэлийн өмчийн ашиглалт, удирдлагын газар гэх мэт төрийн байгууллагуудад ажиллаж зөвлөмж өглөө. Мөн Төрийн бус байгууллага, иргэний нийгмийн байгууллага, олны танил хүмүүстэй хамтран авлигын хор уршгийг таниулах, зорилтот бүлэг рүү чиглэсэн үйл ажиллагааг зохион явууллаа.

Хяналт шалгалт, дүн шинжилгээний ажлын чиглэлээр энэ оны нэгдүгээр улиралд 233 албан тушаалтны ХОМ-ийг нарийвчлан шалгасан. Үүнээс зөрчил илэрсэн 14 албан тушаалтанд хариулага тооцох албан бичгийг эрх бүхий байгууллагад өгсөн. Тодруулбал, албан тушаалтны цалингийн хэмжээг гурван сар хүртэлх хугацаагаар 30 хувь бууруулах зөрчлийг ес, албан тушаал эсвэл албан тушаалын цалингийн хэмжээг бууруулах сахилгын шийтгэл гурав, албан тушаалаас нь чөлөөлөх сахилгын шийтгэлийг хоёр албан тушаалтанд хүргүүллээ.

Албан тушаалтны авлига, ашиг сонирхлын зөрчилтэй холбоотой 184 өргөдөл, гомдлыг хянан үзлээ. Өнгөрсөн оны мөн үетэй харьцуулахад 67.2 хувьтай өссөн үзүүлэлттэй байна. Өргөдөл гомдлын хүрээнд албан тушаалтны буруутай үйл ажиллагааг илрүүлж, зөрчил гаргасан 13 албан тушаалтанд хариуцлага тооцох бичгийг тухайн албан тушаалтанг томилох эрх бүхий этгээдүүдэд хүргүүлсэн.  

Б.Лхам