АТГ өмнөх онд үйлдэгдсэн болон энэ онд гарсан гэмт хэргийн улмаас урьдчилсан байдлаар 11.9 их наяд төгрөгийн хохирлын хэмжээ тогтоогджээ. Үүнээс мөрдөн байцаалтын шатанд 9.7 их наяд төгрөгийг нөхөн төлүүлж, 109.2 тэрбум төгрөгийн хөрөнгө битүүмжлэн хамгаалсан байна. Мөн “Эрдэнэт үйлдвэр” компаниас хөрөнгө завшсан, мөнгө угаасан байж болзошгүй Д, Г нарт холбогдох хэргийн хүрээнд 3.5 тэрбум төгрөгийг битүүмжлэн хамгаалжээ.

Энэ сарын 14-ний өдрийн байдлаар АТГ 73 хэргийг шүүхэд шилжүүлэх саналтайгаар хэргийг прокурорын байгууллагад шилжүүлжээ. Тухайлбал, “Жаст” группын захирал Ш.Батхүүд холбогдох хэрэг, Эрдэнэт үйлдвэрийн ерөнхий захирал асан Ц.Даваацэрэн нарт холбогдох хэрэг, ЭМЯ-ны Төрийн захиргаа, удирдлагын газрын эрүүл мэндийн байгууллагын тусгай зөвшөөрөл хариуцсан мэргэжилтнүүдэд холбогдох хэрэг, Биеийн тамир, спортын хөгжлийн газрын даргаар ажиллаж байсан Д.Жаргалсайхан, УИХ-ын гишүүн Ж.Эрдэнэбат, Г.Солтан, Д.Дамба-Очир нарт холбогдох хэрэг, Ерөнхий сайд асан М.Энхсайхан, Замын-Үүд дэх Гаалийн газрын ахлах байцаагч Я.Очирбатад холбогдох хэрэг, ЭМДЕГ-ын даргаар ажиллаж байсан Ч.Алтанхуяг, Зам тээврийн хөгжлийн яамны Газрын даргаар ажиллаж байсан Д.Доржханд нарт холбогдох хэргүүдийг шүүхэд шилжүүлжээ.  

 Б.Лхам