Дөнгөж 30 шүргэж яваа болов уу гэмээр нэгэн залуу Бөхийн өргөөний автобусны буудлын ойролцоо амны хаалт үнэгүй тарааж байгаатай таарав. Тэрбээр их л даруухнаар “Амны хаалт үнэгүй аваарай. Өөрийгөө болон бусдыгаа хамгаалж, хайрлаарай. Танд баярлалаа” хэмээн амны хаалт тарааж зогсоно. Амны хаалт авсан иргэдийн дунд “Баярлалаа” гээд инээмсэглээд өнгөрөх нэг нь байхад авах ёстой юмаа авч байгаа хүн шиг хандаж, духаа үрчийлгэн харах нэгэн ч байх аж. Гэсэн ч өнөөх залуу огтхон ч дургүйцэхгээр араас нь “Баярлалаа” гээд чанга хэлэх нь их л өөриймсөг хандаж буй нь харагдав. Эл байдлыг хэсэг харж зогсоод түүнтэй ярилцаж үзмээр санагдав. Яагаад амны хаалт үнэгүй тарааж байгааг эхлээд асуулаа. Тэгэхэд өөдөөс нэг их том харснаа “Бид бүгдээрээ нэг дэлхийтэй. Би эрүүл мэндээ хамгаалж чадвал хайртай хүмүүсээ хамгаалж чадна гэсэн үг. Үүн шиг бусад хүмүүс ч гэсэн хайртай хүмүүсээ хамгаалаасай гэж хүссэн” гэж хариулав. Үйл хөдлөл, үг хэл нь төлөв даруухан түүнийг Ж.Батбилэг гэдэг. Худалдаа үйлдвэрлэийн их сургуулийг Эдийн засаг, математик загварчлалын чиглэлээр төгссөн. Хувиараа бизнес эрхлэх сэтгэл шулуудаж, гаднын байгууллагатай хамтарч ажиллахаар зорилт тавьжээ.

Ингэхдээ сайн дурын үйл ажиллагаа явуулах хүсэлдээ дийлдэн ажлын өрөөгөө үүнд тохирсон байдлаар тохижуулах мөрөөдөлтэй гэсэн. Ингээд хүмүүнлэгийн ажил хийх хүсэл тэмүүлэлдээ хөтлөгдөн иргэдэд амны хаалт үнэ төлбөргүй тарааж буй Ж.Батбилэгтэй ярилцсанаа хүргэе.

-Амны хаалт үнэ төлбөргүй тарааж байгаад баярлалаа. Ийм сайхан сэтгэлтэй хүн олон байх болтугай гэж ерөөе. Та яагаад амны хаалт үнэгүй тарааж байгаа юм бэ?

-Баярлалаа. Бид бүгдээрээ нэг дэлхийтэй. Би эрүүл мэндээ хамгаалж чадвал хайртай хүмүүсээ хамгаалж чадна гэсэн үг. Үүн шиг бусад хүмүүс ч гэсэн хайртай хүмүүсээ хамгаалаасай гэж хүссэн. Тиймээс бусдад эрүүл мэндийг хамгаалахад бага боловч тус болъё гэж бодсон. Амны хаалт байтугай хоолны махаа авч дийлэхгүй олон хүн байна шүү дээ.  Эхний ээлжинд нэг ширхэг амны хаалтыг 1.3-1.5 юаниар хятадаас захиалж авчруулсан. Эхний ээлжинд 12500 ширхэг амны хаалт тарааж байна.

-Өөрийнхөө мөнгөөр худалдаж авсан уу?

-Тэгсэн.

-Одоо байгаагаа тараагаад дууссаны дараа яах бэ?

-Энэ аянд бизнес эрхлэгч, олон улсын байгууллагууд нэгдээсээ гэж хүсэж байна. Хандивын мөнгө өгч болно, эсвэл амны хаалт өгсөн ч болно. Хэрвээ хандив өргөвөл амны хаалт хямд үнээр оруулж ирээд үнэгүй тараая гэсэн зорилго бий. Олон нийтийг коронавирусний цар тахлаас хамгаалах хамгийн зөв арга нь хувийн ариун цэвэр сахих, амны хаалт зүүх шүү дээ. Тиймээс энэ ажлыг эхлүүлье гэж бодсон юм. Монгол Улсад дотооддоо коронавирус дэгдээгүй талаар дэлхий дахинд шуугиж байна. Өөрөөр хэлбэл, бид бусад орны иргэдийг бодвол амны хаалт зүүж, эрүүл мэндээ сайн хамгаалж байна. Эдийн засгийн хувьд бусад орныг бодвол арай уначхаагүй байна. Дэлхийн зарим орны дэлгүүрийн лангуу хоосорсон байна. Цар тахал эрчимтэй дэгдэж байгаа орнуудад ямар аймар байгааг бодох хэрэгтэй. Тиймээс иргэдийг маскжуулах зорилго тавин ажиллаж байна.

-Халамжийн байгууллагуудаар явж тараана гэж байсан. Хүсэлт гаргасан байгууллага бий юу?

-Хүсэлт тавьсан асрамжийн газруудад явж тараана. Хүсэлт гаргасан нэг газар бий. Цагаан сараар асрамжийн газар карантилсан юм билээ. Тэр утгаараа асрамжийн газар дахь өвөө, эмээ нартай гаднаас нь золголт хийсэн. Мөн хүнийх нь тоог гаргаж байгаад ажилчдаар нь дамжуулж өгөх бодол бий.

-Өнөөдөр бүтэн өдөржин амны хаалт тараасан гэсэн. Тусалъя, хамтаръя гэсэн хүн байв уу?

-Нэг эмэгтэй байсан. Материалынхаа үнийг тооцоод нэг маскийг 400 төгрөгөөр тооцож өгч болно гэсэн. Хэрэв хандив орж ирвэл хамгийн түрүүнд тэр эгчээс маск авъя гэж бодож байна. Хятадаас хамаагүй хямд тусах юм билээ. Нөгөөтээгүүр, дотоодын үйлдвэрлэлээ дэмжинэ гэсэн үг шүү дээ.

-Төр, засгаас цар тахлаас урьдчилан сэргийлэх, хамгаалар зорилгоор олон үйл ажиллагаа явуулж байна. Иргэн хүний энэ ажлыг хэрхэн дүгнэж байна вэ?

-Манай улсын засаг захиргаа маш сайн ажиллалаа. Үүний үр дүнд эдийн засгаа сөхрүүлчихсэнгүй. Эдийн засаг хямарч байна гэж иргэд ярьж байна. Гэхдээ үүнээс ч илүү муу байж болох байсан шүү дээ. Бүгд гэрийн хорионд, хүнсний хомстолд орж болох байсан. Золоор ийм зүйл болсонгүй. Манай хоёр хөршид халдвар эрчимтэй тархаж байгаа энэ үед амны хаалтаа сайтар зүүх хэрэгтэй. Улсаас нийт иргэдээ амны хаалт олгож чадахгүй байх. Тиймээс иргэд нэгдэх ёстой. Иргэдийн зүгээс хувцас, хоол хүнс, амны хаалт гээд юу ч хандивлаж болно. Хэрвээ танд бусдад өгөх юмсан гэсэн сэтгэл байгаад тараах зав гарахгүй байгаа бол би өмнөөс чинь хийж өгье.

-Одоогоор хэчнээн амны хаалт тараасан байна вэ?

-Өглөө Офицеруудын ордны автобусны буудал дээр очиж тараасан. Нэг цаг гучин минутын хугацаанд 750 ширхэг маск тараасан. Би нийт 12500 ширхэг амны хаалт худалдаж авсан. Энэ эрчээрээ бол хурдан дуусах бололтой. Хэрэв Нарантуул зах дээр тараавал цагийн дотор дуусах шинжтэй. Өнөөдрөөс эхлэн өдөр бүр тогтмол тараана.

-Самбар дээр олон орны хэлээр бичсэн нь анхаарал татлаа?

-НҮБ-ын зургаан хэлээр амны хаалт үнэгүй тарааж байна гэж бичсэн. Хамгийн гол нь эдгээр улсыг ч мөн иргэддээ амны хаалт үнэгүй тараагаасай гэж бодож бичсэн. Тэгэхгүй бол амны хаалт авъя гээд ч хомстол үүссэн ийм нөхцөлд хэцүү шүү дээ. “Эрсдэлийг даван туулахын тулд иргэн бүр ухамсартай бай” гэж хэлж болохгүй л дээ. Ухамсар байлаа гээд санхүү байхгүй бол яах вэ. Санхүү байлаа гээд амны хаалт олдохгүй бол яах вэ. Дэлхий дээр ийм тохиолдол маш олон байна шүү дээ.

-Иргэдийн хандлага хэр ер нь байна вэ?

-Архи амсчихсан нэг ах амны хаалтгүй явж байсан. Амны хаалт өгтөл “Баярлалаа” гэж хэлээд явсан. Царайнаас нь харахад ихэд баярласан шинжтэй байна лээ. Хавь ойр зогсож байсан зарим хүн “шал согтуу хүнд яах гэж өгдөг байна аа” гэх зэргээр хэлж байгаа нь сонсогдсон. Адилхан л хүн биз дээ. Өнөөдөр нийтийн тээврийн хянагч нар их тусалсан. Хамгийн гол нь иргэддээ хандаж хэлэхэд энэ аяныг давалгайлахыг уриалж байна. Бид нэгдэж байж энэ өвчнийг эрсдэл багатайгаар даван туулна шүү. Бүгдээрээ хичээцгээе.

Б.Лхам