БНХАУ-ын Энхтайван хөгжлийн сангийн буцалтгүй тусламжаар барих Улсын хоёрдугаар төв эмнэлгийн 50 ортой хүүхдийн эмнэлгийн нээлтийн шав тавих ёслол өнөөдөр боллоо. Арга хэмжээнд Эрүүл мэндийн сайд Д.Сарангэрэл, БНХАУ-аас Монгол Улсад суугаа Элчин сайд Цай Вэньруй тэргүүтэй хүмүүс оролцлоо. Уг эмнэлэг нь БНХАУ-ын Энхтайван хөгжлийн сан болон “Хангарьд хөгжлийн төв” ТББ-ын хамтын ажиллагааны хүрээнд баригдаж буй тав дахь эмнэлэг аж.

Тодруулбал, БНХАУ-ын Энхтайван хөгжлийн сангийн буцалтгүй тусламжаар 2015 онд Чингэлтэй дүүрэгт хүүхдийн оношлогооны төв, 2018 онд Налайх дүүрэгт 50 ортой хүүхдийн эмнэлэг, 2019 онд Баянзүрх дүүрэгт 50 ортой хүүхдийн эмнэлэг, 2019 онд Хан-Уул дүүрэгт 50 ортой хүүхдийн эмнэлгийг барьж, ашиглалтад оруулжээ.

БНХАУ-аас Монгол Улсад суугаа Элчин сайд Цай Вэньруй “50 ортой хүүхдийн эмнэлгийн шав тавих ёслолд оролцож байгаад маш их баяртай байна. Төслийг Хятадын Энхтайван хөгжлийн сан болон Хангарьд хөгжлийн сангийн шугамаар хамтран хэрэгжүүлж байна. Уг төсөл нь Хятадын Энхтайван хөгжлийн сангийн Улаанбаатарт хэрэгжүүлэх тав дахь төсөл болж байна. Сүүлийн үед хоёр талын түр засгийн харилцаа өнлөр түвшинд явж байна. Олон нийтийн байгууллагын харилцаа, хамтын ажиллагаа тасралтгүй үргэлжилж байна. Өнөөдрийн төсөл үүнийг харуулж байна. Цаашид төрийн харилцаагаа хөгжүүлэхийн зэрэгцээ олон нийтийн хоорондын харилцааг хөгжүүлэхэд чухалчлах болно” гэлээ.

Эрүүл мэндийн сайд Д.Сарангэрэл “Улсын хэмжээнд хүүхдийн орны дутагдал их бий. Ялангуяа өвлийн улиралд томуу, томуу төст өвчний үед орны асуудал их хөндөгддөг. Улаанбаатар хотод 933 хүүхдийн ор бий. Ханиад томууны үеэр 1500 ор шаардлагатай болдог. Энэ үед Төрийн тусгай алба хаагчдын эмнэлэг, Цэргийн төв эмнэлэг, Сонгинохайрхан дүүргийн эмнэлэг рүү шилжүүлэх зэрэг үйл ажиллагаа хийж сүүлийн гурван жилийн хугацаанд хүүхдүүдээ коридорт авахгүй байгаа. Том хүнд үзүүлэх тусламж үйлчилгээгээ ямар нэгэн хэмжээгээр тасалдуулж байж хүүхдүүдээ эмнэлэгт авч эмчилж байна. Бид ямар ч байсан 1000 орны асуудлыг шийдвэрлэчих юмсан гэж зорьж ажиллаж байна. Хагас жилдээ багтаад Сонгинохайрхан дүүрэгт 220 ортой жишиг эмнэлэг ашиглалтад орно. Мөн Хан-Уул, Чингэлтэй дүүрэгт 200 ортой жишиг эмнэлэг баригдана. Жишиг эмнэлэг гэдэг нь дүүргийн иргэд лавлагаа шатны эмнэлгийн тусламж үйлчилгээг амьдарч байгаа газраасаа авах боломжийг бүрдүүлж байна гэсэн үг. Мөн БНХАУ-ын Засгийн газар, Энхтайван хөгжлийн сан бол Эрүүл мэндийн салбарт тус дэмээ өгч байна. Өнгөрсөн жил 50 ортой хүүхдийн эмнэлгийг Хан-Уул дүүрэгт барьж өгсөн. Хоёрдугаар эмнэлгийн хамт олон газраа хадгалж авч үлдсэнд их баярлаж байна” гэлээ.

Б.Лхам