УИХ-ын чуулганаар “Зарим газар нутгийг улсын тусгай хамгаалалтад авах тухай” Засгийн газраас өргөн мэдүүлсэн тогтоолын төслийг хэлэлцэх эсэхийг хэлэлцэж байна.

Хэлэлцэж байгаа асуудалтай холбогдуулан БОАЖ-ын сайд Н.Цэрэнбат “Алт, мөнгө бодохоос илүүтэй ирээдүйд хүүхэддээ юу өвлүүлэхээ бэ гэдгээ боддоггүй юм уу. Ийм хүмүүсийг огт ойлгохгүй юм. Эдийн засаг саарна, орлогогүй болно гэх юм. Түүнээс чинь илүү бидний үр хүүхдийн ирээдүй чухал биз дээ. Байгалиа ухаад дуусахаар ирээдүй үе юун дээр гишгэх юм бэ, юугаар амьсгалах юм бэ” гэж шүүмжилсэн.

Сайд Н.Цэрэнбатын эл шүүмжлэлийг УИХ-ын гишүүн Д.Тэрбишдагва дэмжиж, “Алтнаас илүү үнэтэй зүйл бий шүү. Нэр нь хүртэл Ноён уул. Өөрөөр нэрлэж болох байсан байх. Гэхдээ эртнээс учиртай байсан болоод ийн нэрлэсэн байх. Ноён уулын дор бидний өвөг дээдсийн сүнс, түүхийн үнэт өв оршин буй. Гэтэл гаднын хөрөнгө оруулагч гэдгээс айж байгаль орчноо сүйдлэх юм бэ. Одоо Оюутолгой ярьдаг гишүүн байхгүй боллоо. Шалга гэдэг үүрэг чиглэл өгсөн биз дээ. Ноён уулын 10 тусгай зөвшөөрөл давхацсан асуудлаар шүүх энэ тэр гэж явах байх. Үүнийг шийдүүлж чадах уу? гэлээ.

Харин гишүүн Б.Саранчимэг "Хамгийн гол нь Ноён уулыг дархан цаазат уулд хамааруулахыг дэмжинэ. Гэхдээ нөхөн сэргээлт, тусгай зөвшөөрлийг хэрхэн авах бэ?" гэсэн юм.

Хариуд сайд Н.Цэрэнбат "Ашигт малтмалын тусгай зөвшөөрөл эзэмшигч нөхөн сэргээлт хийх ёстой. Энэ дагуу шаардлага тавина. Нөхөн сэргээлтийн үнэлгээр нэмэгдүүлсэн. Тэрбишдагва гишүүний асуултын хувьд хүчин төгөлдөр хуулиар орон нутгаас тусгай хэрэгцээнд авсан байхад Ашигт малтмалаас тусгай зөвшөөрөл олгосон гэдэг зүйл бий. Сэлэнгэ аймгийн ИТХ 1995 оны тогтоолд өөрчлөлт оруулсан. Ашигт малтмалын тухай хуулийг дандаа ямар нэг баяр, наадмын өмнө нэмэлт, өөрчлөлт оруулсан байдаг. Хилийн зааг өөрчилдөг, ашиглалтын эрх өөрчлөгддөг. Ийм эрх ашгийн зүйл байна. Төрийн өмчийг ААН ашиглаж байна. Үүнийг ойлгох хэрэгтэй. Газар доорх баялаг зөвхөн төрийн өмч. Гэтэл ААН өмчийн эзэн юм шиг хандаж байна. Тэднийг өмөөрч болохгүй ээ. Одоо болон ирээдүйн Монгол иргэнд байгалийн баялагыг тэгш хүртээнэ гэж заасан биз дээ. Үндсэн зарчмаа барьж ажиллавал олон алдаагаа засах боломжтой" гэв.

Бидэнд тусламж хэрэгтэй байна. нэмэгдэл хүч өгөөч гэж албан бичиг явуулсан. Ахиц дэвшил гарч байна.

Г.Маргад